Konferenca Evropiane e Krishterë mbi internetin. Atë Spadaro: duhet t'i ndihmojmë
njerëzit të dallojnë më të rëndësishmen
“Të arrijmë tek njerëzit, në botën e internetit”. Kjo është tema e Konferencës XVII
Evropiane të Krishterë mbi internetin, që u mbajten në Romë deri më 14 qershor. Përfaqësues
të kishave evropiane e të organizatave të krishtera, përmes një sërë takimesh me karakter
ekumenik, po diskutojnë strategjitë, që duhen ndërmarrë për të qenë të dukshëm në
botën e komunikimit dixhital. Në mbledhjen e zhvilluar në selinë e Radio Vatikanit,
u analizuan marrëdhëniet ndërmjet teknologjisë e përshpirtërisë. Drejtori i revistës
së njohur të jezuitëve “Qytetërimi Katolik”, atë Antonio Spadaro ndalet në sfidat
e internetit për të krishterët: Në çastin, kur njeriu është i zhytur në informacion,
si në mes të detit, duhet të gjejë mjete për të zgjedhur, për të kapur pyetjet vërtet
të rëndësishme, përgjigjja e të cilave e bën ta kuptojë si duhet vetë informacionin.
Atëherë, sipas meje, problemi kryesor i kohës sonë qëndron në ndihmën, që u duhet
dhënë njerëzve për t’i gjetur këto pyetje, këto çështje, duke i bërë kështu të aftë
ta filtrojnë informacionin mbi bazën e tyre. Tragjedia e sotme? Gjithçka konsiderohet
e rëndësishme e si pasojë, asgjë nuk është vërtet e rëndësishme. Atë Spadaro,
ju keni thënë se “Interneti nuk është mjet ungjillëzimi”… Rrjeti nuk është
mjet ungjillëzimi, sepse nuk është mjet; është një ambient, prandaj duhet të themi
se është ambient ungjillëzimi. Interneti është ambient, ku pulson jeta: sa prej nesh
lidhen me miqtë, me të dashurit, ose me mjetet e informacionit, përmes rrjetit? Interneti
bëhet kështu ambient, në të cilin ne jetojmë, shprehemi, mendojmë, formojmë opinione,
mbajmë miqësitë. Prandaj, rrjeti nuk është mjet ungjillëzimi: është vend, ku jetojmë
e ku mund të dëshmojmë Ungjillin. Konferenca Evropiane e Krishterë në internet
ka karakater të veçantë ekumenik. A mund ta ndihmojë rrjeti dialogun ndërmjet të krishterëve? Absolutisht,
po. Por ekziston rreziku që në rrjet të krijohen flluska sapuni: ne e dimë se interneti,
Facebook-u e rrjetet shoqërore në përgjithësi, i ruajnë të dhënat e karakteristikat
e të regjistruarve, prandaj, në kontaktet, apo në informacionet për profilin tonë
në rrjetet shoqërore, propozojnë gjëra që duam t’i dëgjojmë, por jo përgjigjet e vërteta
të pyetjeve, që bëjmë. Prandaj, ka rrezik të mbetemi brenda kësaj flluske, të filtruar
nga dikush tjetër, pra brenda grupit të cilit i përkasim, pa u përballuar me probleme,
me kultura e me dëshmi të tjera, që do ta ndihmonin ekumenizmin.