Бэнэдыкт XVI падчас агульнай аўдыенцыі: адзінства з Богам не аддаляе ад рэальнасці
"Малітва, гэта аазіс
супакою, у якім мы можам напіцца вады, што насычае наша духоўнае жыццё і перамяняе
наша існаванне”, - сказаў падчас сённяшняй агульнай аўдыенцыі Бэнэдыкт XVI. Сваю катэхезу
Папа прысвяціў разважанню над словамі св. Паўла, змешчанымі ў 12 раздзеле Другога
Паслання да Карынцянаў. Святы Айцец адзначыў, што Апостал народаў, “перад тымі, хто
пытаўся аб легітымнасці яго апостальства, не пералічваў спісу супольнасцяў, якія заснаваў,
кіламетраў, якія прайшоў; не абмяжоўваўся напамінам аб цяжкасцях і супрацьстаяннях,
з якімі сутыкнуўся пры абвяшчэнні Евангелля, але казаў толькі аб сваіх адносінах з
Панам”. Бэнэдыкт XVI адзначыў, што паводле св. Паўла, ён, трываючы ў глыбокай малітве,
быў узяты на неба, у “сад” Божы, але, каб не ўпасць у пыху і не пачаць хваліцца з
прычыны той велічы, што яму давялося пабачыць, насіў у сваім целе “шып” пакуты. Св.
Павел шмат маліў Пана аб тым, каб Ён аддаліў гэта выпрабаванне, аднак падчас глыбокай
малітвы пачуў словы: “Хопіць табе Маёй ласкі, бо моц выяўляецца ў слабасці”.
Святы
Айцец адзначыў, што св. Павел не ганарыўся тым, што Хрыстус дзейнічаў у яго слабасці,
і гэта паказвае, наколькі ён зразумеў, што значыць быць апосталам Евангелля. Паводле
Пантыфіка глыбокая і даверлівая пакора перад аб’яўляеннем Бога з’яўляецца фундаментальнай
для нашай малітвы і жыцця, для адносін з Богам і нашымі слабасцямі.
“Канешне
Павел жадаў вызваліцца ад гэтага шыпа, ад пакуты, але Бог сказаў “не” – гэта неабходна
для цябе, бо тады атрымаеш дастаткова ласкі для таго, каб супрацьстаяць і зрабіць
тое, што павінен. Гэта тычыцца таксама і нас. Пан не вызваляе нас ад бедаў, але дапамагае
нам узрастаць у пакутах, цяжкасцях, пераследах”, - сказаў Бэнэдыкт XVI.
Папа
падкрэсліў, што ў нашым жыцці толькі давер да Бога і вера ў Яго дабрыню з’яўляецца
гарантыяй таго, што наша дзейнасці не будзе пустой. “Так ласка Пана стала сілай, якая
суправаджала св. Паўла ў шматлікіх цяжкасцях, звязаных з распаўсюджваннем Евангелля,
а яго сэрца увайшло ў сэрца Хрыста, стала здольным весці іншых да Таго, хто памёр
і ўваскрос для нас”, - сказаў Пантыфік і дадаў, што “у малітве мы адкрываем нашы душы
Пану, каб Ён прыйшоў жыць у нашых слабасцях, перамяняючы іх сілай Евангелля”.“У свеце,
у якім мы рызыкуем давяраць толькі эфектыўнасці і моцы чалавечых сродкаў, мы пакліканы
адкрыць нанава і сведчыць аб моцы Божай, якая перадаецца ў малітве”, – сказаў Святы
Айцец.
Папа падкрэсліў, што містыка св. Паўла грунтавалася на яго штодзённых
і глыбокіх адносінах з Богам, Які заўсёды падтрымліваў апостала сваёй ласкай.
“Містыка
не аддаліла яго ад рэальнасці, але наадварот дала яму сілы кожны дзень жыць для Хрыста
і будаваць Касцёл аж да канца часоў у гэтым свеце. Адзінства з Богам не аддаляе ад
свету, але дае нам сілу быць у ім па-сапраўднаму, рабіць тое, што мы павінны ў свеце”,
- сказаў Пантыфік.
Святы Айцец адзначыў, што чым больш вернікі будуць прысвячаць
часу на малітву, тым больш будуць бачыць, што іх жыццё змяняецца і натхняецца сілай
канкрэтнай любові Бога.