Бэнэдыкт ХVI: праз хрост мы выракаемся д’ябла, які імкнецца стаць богам у гэтым свеце
11 чэрвеня Бэнэдыкт
ХVI адкрыў у базыліцы св. Яна на Латэране штогадовы Кангрэс Рымскай дыяцэзіі. Працы
форума, які завершыцца 13 чэрвеня, праходзяць пад дэвізам: “Ідзіце і навучайце ўсе
народы, хрысцячы іх і навучаючы. Нанава адкрыць прыгажосць хросту”. У праграме мерапрыемства
шматлікія канферэнцыі, дыскусіі, набажэнствы. Асноўная ўвага падчас сустрэчы звернута
на каштоўнасць сакрамэнту хросту. Звяртаючыся да ўдзельнікаў Папа сказаў, што праз
абрад хросту мы яднаемся з Богам і ўваходзім у новае жыццё. “У выніку – Бог не з’яўляецца
больш далёкім для нас, мы адчуваем Яго жывую прысутнасць у нашым жыцці і разумеем,
што сталі хрысціянамі дзякуючы Богу”, - сказаў Папа і дадаў, што праз хрост мы яднаемся
таксама з нашымі бліжнімі. Святы Айцец адзначыў, што сакрамэнтальны абрад дапамагае
зразумець: чым з’яўляецца сам па сабе хрост. Папа нагадаў, што абрад складаецца з
двух элементаў: матэрыі – вады, і формы – слова, і дадаў, што вада з’яўляецца важным
рэлігійным сімвалам новага жыцця, але таксама і смерці, пасля якой мы чакаем уваскрасення
да новага жыцця. Акрамя таго, Пантыфік падкрэсліў, што адрачэнне, абяцанне і просьба,
прамоўленыя падчас абраду хросту, застаюцца актуальнымі на працягу ўсяго нашага жыцця.
Бэнэдыкт
ХVI нагадаў, што дзякуючы хросту мы адраджаемся да новага жыцця дзяцей Божых, вызваляемся
ад заганы першароднага граху і выракаемся д’ябла, “які імкнецца стаць богам у гэтым
свеце”.