Komunikatë për integrimin e shërbimit të VIS (Vatican Information Service) me portalin
news.va e me Buletinin e Sallës së Shtypit të Selisë së Shenjtë
Në vazhdën e ndryshimeve në fushën e komunikimeve shoqërore të Selisë së Shenjtë,
Salla e Shtypit e Vatikanit njofton se Shërbimi Informativ i Vatikanit, i njohur me
siglën VIS, nuk do të ekzistojë më si zyrë më vete, duke filluar nga 31 korriku
i këtij viti. Gjithsesi, të abonuarit në këtë shërbim do të vazhdojnë të marrin
informacione të shumta lidhur me Selinë e Shenjtë. “Në kuadrin e zhvillimit
e të koordinimit të veprimtarive të komunikimit shoqëror të Selisë së Shenjtë – shkruhet
në komunikatë – pas orientimeve të Sekretarisë së Shtetit, personeli i VIS destinohet,
pjesërisht për përforcimin e portalit shumëgjuhësh “news.va”, i krijuar para një viti,
në kuadrin e Këshillit Papnor të Komunikimeve Shoqërore, e pjesërisht për publikimin
në shumë gjuhë të Buletinit të Sallës së Shtypit. Siç dihet, portali news.va
mbledh rregullisht e i paraqet në formë të thjeshtë, lajmet kryesore të aktualitetit
të Selisë së Shenjtë e të jetës së Kishës, që publikohen çdo ditë nga Salla e Shtypit,
nga “L’Osservatore Romano”, Radio Vatikani, Agjensia Fides, të pasuruara me video
nga Qendra Televizive e Vatikanit e me fotografitë e shërbimit fotografik të “L’Osservatore
Romano”. Ai funksionon përditë në italisht, anglisht, spanjisht e frëngjisht. Një
nga karakteristikat e tij ka të bëjë me strukturimin në mënyrë të tillë, që të ofrojë
lehtë mundësinë për t’i bashkëndarë materialet e tij në rrjetet shoqërore të internetit
(si Facebook e Twitter) si edhe në platforma të ndryshme celulari, përmes aplikimeve
të reja. Buletini i Sallës së Shtypit është publikuar deri tani, kryesisht
në gjuhën italiane, përveç rastit kur ekzistojnë tekste origjinale në gjuhë të tjera,
ndërsa VIS ka punuar rregullisht në katër gjuhë. Hyrja e një pjese të personelit të
VIS (anglisht, frëngjisht e spanjisht folës) në punën e zakonshme të Sallës së Shtypit
do të mundësojë risimin e publikimit në rrjet të Buletinit, i cili do të përfshijë
përkthimet e plota të teksteve të ndryshme e, edhe sintezën e atyre teksteve, për
të cilat nuk është e mundur të jepet përkthimi i plotë. Kjo do të bëhet gradualisht,
duke filluar nga shtatori 2012. Pjesët e përkthyera të Buletinit, së bashku
me përmbledhjet në gjuhë të ndryshme nga italishtja, do të vazhdojnë të dërgohen në
adresën e rreth 60 mijë të abonuarve në VIS, të cilët nuk do ta humbasin shërbimin,
që e kanë vlerësuar prej kohësh. Edhe arkivi i pasur prej 85 mijë lajmesh në gjuhë
të ndryshme, realizuar në rreth 20 vjet nga VIS, i pajisur me një sistem kërkimi të
thjeshtë e të shpejtë, do të ruhet e do të integrohet me faqen e internetit të Sallës
së Shtypit të Vatikanit”.