Filloi, me takime e dëshmi, Kongresi i 50-të Eukaristik, në Dublin
“Eukaristia, bashkim me Krishtin e bashkim ndërmjet nesh”; me këtë frymë nisi, në
Dublin të Irlandës, Kongresi i 50-të Eukaristik Ndërkombëtar, që do të vijojë deri
të dielën e ardhshme. Me ndihmën e dy mijë vullnetarëve, në Arenën e Royal Dublin
Society (Rojel Dablin Sosaiti), mijëra shtegtarë, ardhur nga 120 vende të ndryshme
të botës, nga Shqipëria, në Zimbabve, kremtojnë Eukaristinë, luten së bashku, marrin
pjesë në konferencat e përgjithshme, mbajtur nga 18 oratorë ndërkombëtarë, dëgjojnë
e japin dhjetra dëshmi, takohen në njërin nga 150 laboratorët, ku ballafaqohen grupet
e ndryshme. Pak orë më parë, kryeipeshkvi i Dublinit, imzot Diarmuid Martin, përfundoi
konferencën e shtypit, për të cilën na flet e dërguara e Radio Vatikanit, Emer
Mc-Charty, nga Dublini:
Përgjigje: - Kryeipeshkvi Martin
shprehu kënaqësinë e tij për këtë fillesë; dita e parë, e hëne, ishte plot e përplot
me njerëz. Nuk priteshin kaq shumë. Madje jo të gjithë ata, që dëshironin t’i ndiqnin
dëshmitë, mundën të hyjnë në sallë, sepse nuk kishte më vend. E kjo flet për interesimin
e madh, me të cilin po ndiqet Kongresi.
Pyetje: - Ç’mund të na thoni
për temën e sotme, ekumenizmin?
Përgjigje: - Vërtet, fjalimet
e sotme u përqendruan mbi temën e bashkimit në Pagëzim të të gjithë të krishterëve,
e jo vetëm katolikëve. Sot, Kongresi i 50-të Ndërkombëtar ua hapi portat të gjitha
Kishave të pranishme në Irlandë, të cilat kanë këtu edhe përfaqësuesit e tyre. Kujtoj
se sot paradite ishte kryeipeshkvi anglikan i Dublinit, Majkëll Xhekson, ai që kryesoi
Liturgjinë e Fjalës, nën shenjën e ekumenizmit. Në Irlandë, ku në të kaluarën marrëdhëniet
ndërmjet kishave të ndryshme nuk kanë qenë edhe aq të lehta, kjo temë ngjall shumë
interes. Kremtohet Kongresi i 50-të Eukaristik, e pikërisht 50
vjet pas hapjes së Koncilit II të Vatikanit: Atë Vitor Bokardi, i sekretarisë
së Komitetit Papnor për Kongreset Eukaristike Ndërkombëtare, na e shpjegon këtë lidhje
të ngushtë: Përgjigje: - Ekleziologjia eukaristike e bashkimit
është filli i kuq, që përshkon të gjitha punimet e Koncilit II Ekumenik e që, duke
u nisur nga vetë Koncili, hyri, pastaj, si ide e përgjithshme në jetën e Kishës. Nuk
është gjë tjetër, veçse përpjekje për të kuptuar se Kisha ndërtohet, duke u nisur
nga Kremtimi i Eukaristisë.