Ati i Shenjtë, kapelanëve të aviacionit civil: në aeroporte, të lulëzojë fara e Ungjillit
Aeroportet pasqyrojnë gjithnjë e më shumë realitetin e globalizuar bashkohor, prandaj,
në hapësirat e tyre, përqendrohen ankthet e vështirësitë e kohës sonë. Në një audiencë
tjetër, me pjesëmarrësit e seminarit XVI ndërkombëtar të kapelanëve katolikë të aviacionit
civil, Papa vuri në dukje se në aeroport mund të takohen njerëz me kombësi, kulturë,
fe e, edhe me probleme të ndryshme, të cilëve u duhet çuar Fjala e Zotit: “Mendoj,
për shembull, për ata, që presin me ankth në përpjekjen për të kaluar pa dokumentet
e nevojshme, si emigrantë, ose si refugjatë; mendoj për problemet e shkaktuara nga
masat kundër terrorizmit. E pastaj, edhe në bashkësitë aeroportuale pasqyrohet kriza
e fesë, e cila prek shumë njerëz: përmbajtja e doktrinës së krishterë e vlerat, që
mëson ajo, nuk konsiderohen më pika referimi as në vendet me traditë të gjatë kishtare”. Në
këtë situatë, kapelanët e aviacionit civil duhet ta kumtojnë Ungjillin me shembull
e me dëshmi, të vetëdijshëm se… “…pavarësisht nga rastësia e takimeve, njerëzit
dinë ta njohin njeriun e Zotit. Shpesh, edhe fara e vogël, e hedhur në tokë pjellore,
mund të lulëzojë e të japë fryte të begata”. Lëvizja e vazhdueshme dhe teknologjia,
që mbizotëron në aeroport, mund ta zvogëlojë rëndësinë e njeriut, ta bëjë atë gati
të padukshëm, tha Papa: “Shpesh, u kushtohet vëmendje më e madhe efikasitetit
e prodhimtarisë, në dëm të dashurisë për të afërmin e në dëm të solidaritetit, që
duhet të karakterizojë gjithmonë marrëdhëniet njerëzore. Edhe këtu, prania juaj është
e rëndësishme dhe e çmuar: është dëshmi e gjallë në Zotin, i cili i qëndron pranë
njeriut; është thirrje për të mos qenë kurrë indiferentë me kë takojmë, por për ta
trajtuar me mirësjellje e dashuri”. Në këtë kuadër, marrin rëndësi të veçantë
kapelat e aeroporteve, vende heshtjeje e përtëritjeje shpirtërore. Shembulli për këtë
lloj shërbimi, nënvizoi Papa, është e Shenjtnueshmja Virgjëra Mari, e nderuar si Zoja
e Loretos, Pajtore e të gjithë udhëtarëve, për të kujtuar traditën e mbartjes së mrekullueshme
të Shtëpisë së Marisë nga Nazareti në Loreto. E Maria nuk mund të mos na çojë drejt
Birit Hyjnor, drejt Krishtit. Ky është misioni i Kishës, përfundoi Benedikti XVI:
të kumtojë Jezu Krishtin, Shëlbuesin e vetëm e të përtërijë veprën e ungjillëzimit
të botës, ku globalizimi i ka bërë më të afërt njerëzit e popujt.