Бэнэдыкт XVI перад “Анёл Панскі”: Эўхарыстыя вучыць дзяліцца жыццём і дабротамі
“Няхай у кожнай касцёльнай
супольнасці распаўсюджваецца і ўзрастае сапраўдная і глыбокая вера ў Эўхарыстычную
таямніцу”, - з такімі словамі звярнуўся да сабраных на плошчы св. Пятра вернікаў Бэнэдыкт
XVI. 10 чэрвеня, перад малітвай “Анёл Панскі” Папа звярнуўся да іх з кароткай прамовай,
якую прысвяціў значэнню сакрамэнта Эўхарыстыі, эўхарыстычнай адарацыі, а таксама Урачыстасці
Цела і Крыві Хрыста, якая адзначаецца сёння ў многіх краінах свету. “Дарагія браты
і сёстры! – сказаў Папа – Сёння ў Італіі і многіх іншых краінах святкуецца “Corpus
Domini”, гэта значыць Урачыстасць Цела і Крыві Хрыста, Эўхарыстыі. Застаецца заўсёды
жывой традыцыя ў гэты дзень праводзіць урачыстыя працэсіі з Найсвяцейшым Сакрамэнтам,
па вуліцах і плошчах. У Рыме працэсія ўжо адбылася на дыяцэзіяльным узроўні ў мінулы
чацвер, дакладна ў дзень гэтага свята, якое кожны год аднаўляе ў хрысціянах радасць
і ўдзячнасць за эўхарыстычную прысутнасць Езуса паміж намі.
Урачыстасць “Corpus
Domini” з’яўляецца вялікім актам публічнага культу Эўхарыстыі, сакрамэнта ў якім Пан
застаецца прысутным таксама пераўзыходзячы час цэлебрацыі, каб быць заўсёды з намі,
на працягу гадзін і дзён. Ужо св. Юстын, які пакінуў нам адно з самых старажытных
сведчанняў эўхарыстычнай літургіі, сцвярджаў, што пасля раздачы камуніі прысутным,
кансэкраваны хлеб дыяканы неслі таксама і тым, хто адсутнічаў (пар. Apologia, 1, 65).
Таму ў касцёлах самым сакральным месцым з’яўляецца тое, дзе захоўваецца Эўхарыстыя.
З гэтай нагоды я не магу не думаць без пачуццяў аб шматлікіх касцёлах, якія былі сур’ёзна
пашкоджаны землятрусам ў Эміліі-Раман’і і аб факце, што таксама і эўхарыстычнае Цела
Хрыста, у табернакулюмах, у некаторых выпадках засталося пад заваламі. З любоўю малюся
за супольнасці, якія разам са сваімі святарамі павінны сабрацца для удзелу ў св. Імшы
на адкрытым паветры ці ў вялікіх намётах; я дзякую вам за сведчанне і за тое, што
вы робіце для ўсяго народа. Гэта сітуацыя яшчэ больш узвышае важнасць быцця аб’яднанымі
ў імя Пана і сілы якая паходзіць з Эўхарыстычнага Хлеба, які называюць таксама “хлебам
пілігрымаў”. Ад дзялення гэтым хлебам нараджаецца і аднаўляецца здольнасць дзяліцца
таксама жыццём і дабротамі, несці цяжары адно аднаго, быць гасціннымі і адкрытымі.
Урачыстасць
Цела і Крыві Хрыста прапануе нам таксама нанава паглядзець на каштоўнасць эўхарыстычнай
адарацыі. Слуга Божы Павел VI нагадваў, што Каталіцкі Касцёл вызнаваў культ Эўхарыстыі
“не толькі падчас св. Імшы, але таксама і па-за цэлебрацыяй, захоўваючы з максімальнай
стараннасцю кансэкраваныя гостыі і выстаўляючы іх для ўрачыстага ўшанавання вернікамі
хрысціянамі, носячы іх у працэсіі з радасцю хрысціянскага народа” (Enc. Mysterium
fidei, 57). Малітва адарацыі можа здзейсняцца як асабіста, у разважанні перад табернакулюмам,
так і ў камунітарнай форме, з псальмамі і спевамі, але заўсёды аддаючы перавагу маўчанню,
у якім можна ўнутранна слухаць жывога і прысутнага ў сакрамэнце Пана. Панна Марыя
з’яўляецца настаўніцай таксама і гэтай малітвы, бо ніхто лепш за яе не умеў сузіраць
Езуса з позіркам веры і прымаць у сэрцы глыбокія водгукі яго чалавечай і боскай прысутнасці.
Няхай, праз яе заступніцтва распаўсюджваецца і ўзрастае ў кожнай касцёльнай супольнасці
сапраўдная і глыбокая вера ў Эўхарыстычную таямніцу”.
Пасля малітвы “Анёл Панскі”
Папа нагадаў, што ў наступны чацвер, 14 чэрвеня, будзе адзначацца Сусветны дзень донараў
крыві, заснаваны Сусветнай арганізацыяй аховы здароўя. “ Я выказваю сваю вялікую ўдзячнасць
усім тым, хто практыкуе гэту форму салідарнасці, неабходную для жыцця шматлікіх хворых”,
- сказаў Пантыфік.