Të hënën, më 11 qershor, Papa hap takimin dioqezan në Romë.
Të hënën e ardhshme Papa do të hapë punimet e takimit dioqezan të Romës, që do të
mbahen në Bazilikën e Shën Gjonit në Lateran, duke nisur nga ora 19.30. Tema e
zgjedhur nga dioqezi i Papës për takimin e sivjetëm është “Shkoni e bëni dishepuj,
duke pagëzuar e duke mësuar(Mt, 19-20). Të rizbulojmë bukurinë e Pagëzimit”. Natën
e parë, pas përshëndetjes së hapjes, mbajtur nga kardinali mëkëmbës, Agostino Valini
dhe fjalimit të Papës, fjalën do ta marrë imzot Krispino Valenciano, i Institutit
Liturgjik të Shën Anselmit, këshilltar i Komisionit Papnor për Pasuritë Kulturore,
që do të flasë për bukurinë e Pagëzimit, duke u nisur nga ikonografia e Gurrës së
Pagëzimit apo Baptisterit dhe e Bazilikës lateranense. Mbrëmja e dytë do të nisë
me referatin e kardinalit Valini, që do të ketë në qendër të vëmendjes realitetin
e Pagëzimit, duke u mbështetur në informacionet e famullive romake, të pyetura për
ecurinë e Sakramentit. Mbrëmja do të përfundojë me fjalën e imzot Andre Lonardo,
drejtor i zyrës katekistike dioqezane, që do të paraqesë materialin ndihmës për punën
baritore lidhur me Sakramentin e Pagëzimit. Materiali, që do të jetë i gatshëm nga
fundi i korrikut, ka për qëllim të japë ndihmesën e vet në formimin e katekistëve,
duke pasur parasysh vitin e ardhshëm baritor. Të mërkurën, 13 qershor, punimet
do të përfundojnë në prefekturat, ku zhvillohen asambletë për ballafaqimin e parë
programatik, lidhur me çështjet që do të dalin gjatë dy ditëve të para të takimit.