“L’Osservatore Romano”: Жанна Д’Арк – дзяўчына, якая не баялася быць іншай
“Дзяўчына, якая не
баялася быць іншай” – пад такім загалоўкам у сённяшнім “L’Osservatore Romano” быў
надрукаваны артыкул французскага кардынала Жана Луі Тарана. прысвечаны св. Жанне Д’Арк.
Старшыня Папскай рады па міжрэлігійным дыялогу адзначыў, што гэта святая мела глыбокую
веру і паставіла Езуса на першае месца ў сваім жыцці. “Верыць у Бога, не значыць верыць
у яго існаванне, але ў тое, што ён дзейнічае ў нашым жыцці”, - адзначыў іерарх і дадаў,
што прыняць гэта, не заўсёды зручна, сведчаннем чаму з’яўляецца жыццё Жанны Д’Арк.
Кардынал Таран распавёў, што святая перажыла шмат цяжкасцяў, і нават адно з самых
жорсткіх катаванняў: асуджэнне Касцёлам. “Ёсць мала святых, якія б перажылі такую
глыбокую адзіноту, як гэта дзевятнаццацігадовая дзяўчына”, - падкрэсліў іерарх. Ён
дадаў, што нягледзячы на асуджэнне, святая не адмовілася ад веры ў Хрыста і яго Містычнага
Цела, якім з’яўляецца Касцёл. Іерарх цытуе Бэнэдыкта XVI, які паставіў св. Жанну Д’Арк
за прыклад для сучаснай моладзі, што павінна браць на сябе адказнасць за палітычнае
і грамадскае жыццё і асвятляць яго евангельскай любоўю.
“Мы не павінны мець
комплексаў. Не павінны баяцца быць іншымі і ісці супраць плыні. Мы не можам быць святлом
у начы не будучы пытаннем для іншых. Не можам быць хрысціянамі і заключаць пакты з
цемрай. Існуе шмат сфер чалавечага жыцця, дзе выбары, паводзіны, праграмы, маюць тэрміновую
патрэбу ў тым, каб быць асветленымі любоўю Хрыста, вылітай на нас праз Святога Духа
і робячай нас па-сапраўднаму светлымі і дальнабачнымі, як Жанна”, - напісаў у ватыканскай
газеце кардынал Таран.