Ոչ Եւս Է Հայազգի Մեծ Աստուածաբան, Միջ-եկեղեցական Շարժումի Մասնագէտ Եւ Հայ Դատի Քաջ
Պաշտպանը՝ Վեր. Ահարոն Սափսըզեան ։
Արամ Ա Կաթողիկոսին Ցաւակցական գիրը այս առթիւ Երկուշաբթի, 4 յունիսի
առաւօտուն, Ժընեւի Եկեղեցիներու համաշխարհային խորհուրդի կեդրոնի մատրան մէջ տեղի ունեցաւ
յուղարկաւորութիւնը վեր. Ահարոն Սափսըզեանին: Հանգուցեալի ընտանիքին կողքին յուղարկաւորութեան
ներկայ էին Եկեղեցիներու համաշխարհային խորհուրդի ընդհանուր քարտուղարը եւ պաշտօնէութիւնը,
Զուիցերիոյ եկեղեցիներու ներկայացուցիչները, ինչպէս նաեւ ազգայիններ Զուիցերիոյ զանազան
շրջաններէն: Այս առիթով Արամ Ա. կաթողիկոս իր ցաւակցական գիրին մէջ, որուն ընթերցումը
կատարեց կաթողիկոսարանի միջեկեղեցական յանձնախումբի փոխատենապետուհի Թենի Սիմոնեան, վեր.
Ահարոն Սափսըզեանը ներկայացուց իբրեւ մեծ աստուածաբան, միջ-եկեղեցական շարժումի մասնագէտ
եւ Հայ դատի քաջ պաշտպան: Վեր. Սափսըզեանը ծնած է Հալէպի մէջ 1927 թուին Ցեղասպանութենէ
վերապրած մարաշցի ծնողքէ եւ իր փոքր տարիքին ծնողքին հետ հաստատուած է Պրազիլի մէջ: Ան
Պրազիլի մէջ հիմնած է Աստուածաբանական քոլեճներու միութիւնը. եղած է Լոնտոնի Աստուածաբանական
ուսմանց հիմնադրամի Միջին Արեւելքի եւ Հարաւային Ամերիկայի պատասխանատուն, ապա` Եկեղեցիներու
համաշխարհային խորհուրդի Աստուածաբանական ուսմանց բաժանմունքի տնօրէնը: Իր աստուածաբանական
ու միջեկեղեցական աւելի քան 50 տարիներու վրայ տարածուած գործունէութեան առընթեր, վեր.
Սափսըզեան հայ ժողովուրդի իրաւունքներու հետապնդման բերած է իր գործօն մասնակցութիւնը`
հրատարակութիւններու եւ դասախօսութիւններու ճամբով թէ՛ Պրազիլի եւ թէ՛ Զուիցերիոյ մէջ:
Ան մօտէն ճանչցած է Մեծի Տանն Կիլիկիոյ գահակալները` Խորէն Ա., Գարեգին Բ. եւ Արամ Ա.
կաթողիկոսները: Իբրեւ գնահատանք իր ծառայութեան, շուրջ երկու տարիներ առաջ Արամ Ա.
կաթողիկոս զինք պարգեւատրեց «Մեսրոպ Մաշտոց»-ի շքանշանով: