Кардынал Равазі: Касцёл патрабуе сучаснай касцёльнай музыкі
У адным з рымскіх
касцёлаў 4 чэрвеня адбыўся дыялог паміж кардыналам Джанфранка Равазі і славутым італьянскім
дырыжорам Рыкарда Муці. Унутры касцёлаў чалавек павінен знайсці надзвычайнае перапляценне
паміж чалавечым і боскім, якое адбываецца ў літургіі, адзначыў кардынал Равазі. Ён
дадаў, што, акрамя музыкі мінулых часоў, Касцёл мае патрэбу ў вялікіх сучасных музыкантах,
творы якіх дазволілі б перажываць літургію дзякуючы новай мове. На думку кардынала,
жаданне чуць у касцёле музыку простую і зразумелую не можа прывесці да яе баналізацыі;
у творах заўсёды павінна захоўвацца сакральнае вымярэнне. Дыялог паміж іерархам і
кампазітарам прайшоў у рамках праекту “Дзверы ў вечнасць. Чалавек і Абсалют у мастацтве”,
які ў 2011 г. пачала Камісія па сацыяльных камунікацыях Вікарыяту Рыма ў супрацоўніцтве
з ініцыятывай “Падворак язычнікаў” Папскай рады па культуры.
Рыкарда Муці,
у сваю чаргу, адзначыў, што літургічная музыка павінна быць вельмі простай, каб яе
маглі разумець і успрымаць усе. “Музыка павінна мець здольнасць падняць дух тых, хто
прыходзіць у Касцёл маліцца, але таксама і тых, хто не з’яўляецца вернікам. Увесь
свет прасякнуты гукамі, якія мы не можам зразумець, але яны нас пранізваюць і дазваляюць
быць істотамі, створанымі для музыкі”, - сказаў італьянскі кампазітар.