Кс. Ламбардзі: не здзіўлюся, калі ў бліжэйшыя дні будуць апублікаваны наступныя канфідэнцыйныя
дакументы
Кс. Фэдэрыка Ламбардзі
паведаміў, што падарожжа Папы на Сусветную сустрэчу сем’яў у Мілан прайшло лепш, чым
можна было спадзявацца. “Гэта была вельмі значная для грамадства і чалавецтва агульнакасцёльная
падзея”, - адзначыў кіраўнік Залы Друку. Ён дадаў, што для Папы тры дні, праведзеныя
ў Мілане, былі часам радасці, што дапамагло Пантыфіку паглядзець з надзеяй на апошнія
праблемы, ад якіх церпіць Касцёл. Кс. Ламбардзі падкрэсліў, што ў гэтыя дні Святы
Айцец быў вельмі спакойны і шчаслівы. “Ён заўсёды вельмі ўважлівы і чулы на праявы
любові да яго з боку вернікаў і таму перажываў з радасцю і падзякай апладысменты з
іх боку падчас св. Імшы ў нядзелю раніцай”, - падзяліўся італьянскі езуіт.
Адносна
апублікавання адной з італьянскіх газет новай партыі асабістай карэспандэнцыі Бэнэдыкта
XVI, прадстаўнік Святога Пасаду адзначыў, што “Папа не здзіўлены апублікаваннем новых
дакументаў і яго гэта ўжо больш не хвалюе”. Што тычыцца асабістага меркавання кс.
Ламбардзі аб сітуацыі, ён адзначыў, што вельмі заклапочаны агульнай сітуацыяй вакол
выкрадзеных канфідэнцыйных дакументаў і яму застаецца толькі пытаць сябе пра сэнс
і мэту гэтага ўчынку. Кіраўнік Залы Друку дадаў, што “не здзівіцца, калі ў бліжэйшыя
дні будуць апублікаваны наступныя дакументы”. “Зразумела, што той, хто мае зараз у
сябе шмат выкрадзеных дакументаў грае імі паводле сваёй стратэгіі і мэтаў. Вядома,
што ён не апублікуе іх толькі адзін раз, каб затым пакінуць нас у спакоі”, - сказаў
кс. Ламбардзі.