«Ոսկէ Ծիրան» Միջազգային Շարժապատկերի 9րդ Փառատօն.

1 Յունիսին «Ոսկէ Ծիրան» Երեւանի Միջազգային Շարժապատկերի փառատօնը մամլոյ ասուլիսիով մը ներկայացուց այս տարուան փառատօնի ժապաւէններու արտամրցութային ծրագիրները:
«Ոսկէ Ծիրան» միջազգային շարժապատկերի 9րդ փառատօնը պիտի պահէ արդէն աւանդութիւն դարձած «Երեւանեան փրեմիերաներ», «Յետահայեաց ցուցադրութիւններ» եւ «Յարգանքի տուրք» արտամրցութային ծրագիրները: Անցեալ տարուան նման, այս տարի եւս ԱՊՀ երկիրներու մարդասիրական համագործակցութեան միջ-պետական հիմնադրամի աջակցութեամբ տեղի պիտի ունենան ԱՊՀ երկիրներու շարժապատկերի ծրագիրները: Այս տարի ՈՒՆԵՍՔՕի կողմէ Երեւանը Գիրքի Համաշխարհային Մայրաքաղաք հռչակելուն առիթով փառատօնին ընթացքին նկատի առնուած է նոր ծրագիր մը՝ «Գիրք եւ Շարժապատկեր» խորագիրով:

Յատուկ կարեւորութեամբ պիտի նշուի նաեւ Անտրէ Թարկովսկիի 80ամեակը: Պիտի ներկայացուին նաեւ իր եւ իր գեղարուեստական ղեկավարութեամբ պատրաստուած ժապաւէնները։ Պիտի ցուցադրուին Թարկովսկիի «Աւետարան ըստ Անտրէի» եւ «Սոլարիս» ժապաւէնները, ինչպէս նաեւ «Գլտոնն ու ջութակը» եւ «Այսօր ազատում չի լինի» շարժապատկերները: Ծրագիրը պիտի ներառէ նաեւ Բագրատ Յովհաննիսեանի «Հնձան» (գեղ. ղեկ.՝ Ա. Թարկովսկի), Արա Ահարոնեանի «Երազ» (բեմագրութեան հեղինակ՝ Թարկովսկի) եւ Արսէն Ազատեանի ու Նարինէ Մկրտչեանի՝ Թարկովսկիին նուիրուած «Անտրէ» ժապաւէնը։