Арыштаваны камердынер
папы Бэнэдыкта XVI будзе дапытаны ватыканскімі следчымі не раней за бліжэйшы панядзелак,
паведаміў кіраўнік Залы Друку кс. Фэдэрыка Ламбардзі 31 мая ў Ватыкане. Дакументы
двух адвакатаў Паола Габрыэле яшчэ не былі прадстаўлены; гэта неабходна для распачацця
працэдуры допытаў. Таму іх пачатку трэба чакаць не раней за “панядзелак ці аўторак”.
Раней паведамлялася, што судовыя працэдуры маглі распачацца нават 1 чэрвеня. Былы
папскі камердынер быў арыштаваны ў сераду па падазрэнні ў крадзяжы канфідэнцыйных
дакументаў Пантыфіка і Святога Пасаду.
Кс. Ламбардзі таксама паведаміў, што
каталагізацыя дакументальнага матэрыялу, які быў знойдзены ў кватэры камердынера,
працягваецца. Прадстаўнік Апостальскай Сталіцы не паведаміў падрабязнасцяў аб саміх
канфіскаваных дакументах і спосабе іх захоўвання. Ён таксама абверг інфармацыю, што
ватыканская жандармерыя праводзіла следчыя дзеянні на тэрыторыі Італіі. Такія паведамленні
“абсалютна неабгрунтаваныя”, сказаў кс. Ламбардзі.