“Shqipëria në kinemanë e vet”: titullohet kështu veprimtaria e organizuar nga Shoqata
shqiptaro-italiane “Occhio Blu – Anna Cenerini Bova” në Shtëpinë e Kinemasë në Romë,
ku nga data 2 deri më 5 qershor, do të projektohen 8 filma të rëndësishëm shqiptarë,
prodhuar ndërmjet viteve 1995 e 2011. Tematikat e trajtuara denoncojnë regjimin komunist
të Enver Hoxhës, analizojnë tragjedinë shoqërore të emigracionit, tensionet e brendshme
të modernizimit plot kundërshti të vendit e kontribuojnë në zbulimin e mistereve të
Atdheut të Shqiponjave, duke hedhur poshtë stereotipet e krijuara për shqiptarët në
Itali. Në tri ditë, duke filluar nga ora 18.30 e së shtunës, në dy salla të Shtëpisë
së Kinemasë, do të shfaqen filma si “Parrullat”, filmi i parë shqiptar i përzgjedhur
në Festivalin e Cannes, por edhe “Koloneli Bunker” i Kujtim Çashkut e “Honeymoons”
i Goran Paskaljeviçit, regjizor i njohur serb, në bashkëpunimin e tij të parë me shqiptarët.
U kujtojmë emigrantëve të Romës, që duan të marrin pjesë në këtë veprimtari se Shtëpia
e Kinemasë ndodhet në Vilën Borgeze. Informacione më të hollësishme për oraret e filmave
dhe përmbajtjen e tyre mund të gjenden në faqen e saj të internetit www.casadelcinema.it.