Takimi Botëror i Familjeve: ekonomia të jetë në shërbim të familjeve. Nesër, Papa
në Milano
Puna e pasigurtë është kërcënim për familjen, e cila nuk mund të ketë dinjitet pa
burimin kryesor, që i jep mundësinë të jetojë. Ky është thelbi i fjalës, që mbajti
sot, në Takimin Botëror të Familjeve në Milano, kardinali Dionigji Tetamanci. Dita
e dytë e Kongresit ndërkombëtar, që po mbahet në qytetin italian, në pritje të Papës
Benedikti XVI, i cili nesër do të përqafojë familjet e pranishme në Takim. Cilat
janë marrëdhëniet ndërmjet familjes e punës, në perspektivën e fesë? Kësaj pyetjeje
iu përgjigj kardinali Tetamanzi para përfaqësuesve të pesë kontinenteve, duke u mbështetur
në Shkrimin e Shenjtë e në doktrinën shoqërore të Kishës: “Dashuria e puna,
së bashku me festën, janë vërtet elemente thelbësore të jetës familjare. Pa këto realitete
nuk do të kishte as humanitet, as familje, as jetë, as zhvillim i një bote të re,
që mund të bëhet gjithnjë e më e njerëzishme e mund të përmirësohet nga dashuria e
nga ‘dominimi” i njeriut”. Kardinali Tetamanzi foli për marrëdhëniet ndërmjet
punës e pushimit javor. Përmendi Shkrimin e Shenjtë, ku pushimi i së shtunës është
shenjë e çlirimit të njeriut nga ajo lloj pune, që kuptohet si skllavëri, si shtypje,
si shfrytëzim: “Vërtet, koha e punës, ndan e përçan në mënyrë të pashmangshme,
por kur pushojmë dhe festojmë, pabarazitë shoqërore sheshohen: familjarizohemi me
të tjerët, bashkëndajmë, komunikojmë… Po, kemi nevojë – e sot, edhe më shumë se dje
– për një kohë feste të jetuar nga e gjithë familja, sepse ajo është e rëndësishme,
është e dosmosdoshme, si në profilin shoqëror, ashtu edhe në atë edukativ”.