Pikëllimi i Papës për masakrat në Siri; thirrje e Selisë së Shenjtë për t’i dhënë
fund dhunës. Dëshmia e nuncit në Damask.
“Masakra e fundit në Hula, me pasojë vdekjen e qindra njerëzve, ndërmjet të cilëve,
49 fëmijë, e pikëlloi dhe e shqetësoi thellësisht Papën, por edhe bashkësinë katolike
e atë ndërkombëtare. Të gjithë e dënuan njëzëri këtë akt tragjik”. Kështu shkruhet
në një komunikatë të Sallës vatikanase të Shtypit, botuar dje, përmes së cilës Selia
e Shenjtë i nxit të gjitha palët e interesuara, si dhe mbarë bashkësinë ndërkombëtare,
të mos kursejnë asnjë përçapje për t’i dhënë fund krizës përmes dialogut e pajtimit.
Bëhet thirrje edhe që të marrë fund çdo formë dhune. Ndërsa liderëve dhe besimtarëve
të feve të ndryshme u drejtohet ftesa të vihen me të gjitha forcat në shërbim të paqes,
për të mirën e mbarë popullsisë. Ndërkaq nga Siria vjen lajmi se shumë nga viktimat
e masakrës së Hulës, u vranë masivisht nga disa milicë, besnikë të Assadit. Sipas
zëdhënësit të Komisariatit të Lartë të Kombeve të Bashkuara për të drejtat e njeriut,
Rupert Colville, ata që mundën të shpëtojnë, dëshmojnë se vetëm rreth 20 nga viktimat
e masakrës gjakatare, u vranë nga të shtënat e tankeve, që hapën zjarr mbi njerëzit
e tmerruar. Edhe orët e fundit vijoi numërimi i të vdekurve: të paktën 32 në veri
të Sirisë. Presidenti francez Hollande, dha njoftimin për dëbimin e ambasadorit
sirian në Paris. Që dje, i dërguari i posaçëm i Kombeve të Bashkuara, Kofi Annan është
në Damask, ku sot bisedoi me presidentin Assad. Për afërsinë e Papës dhe shpresat
për qetësimin e gjendjes në Siri, folëm, në telefon me nuncin apostolik, imzot
Mario Zenari. Ta dëgjojmë, nga Damasku:
Përgjigje: -
Na ndihmon gjithnjë afërsia e Papës. Është ndihmë t’i dëgjosh mesazhet e tij, ta prekësh
dhimbjen e tij, e edhe shpresën e thirrjen për të dalë nga ky rreth skëterror dhune.
Thirrjet e Papës, mesazhet e tij, këtu ndiqen me vëmendje të madhe, Sot paradite mora
një letër në arabisht. E përktheva menjëherë. Vinte nga besimtarë të thjeshtë myslimanë,
të cilët kishin marrë vesh se Ati i Shenjtë, përveç afërsisë, duke parë vuajtjet e
popullit sirian, ka dërguar edhe ndihma konkrete, përmes Këshillit Papnor “Cor Unum”.
Këtu shenja të tilla ndiqen me vëmendje të madhe, e me të njëjtën vëmendje, edhe mesazhet
e Papës. Sigurisht këto mesazhe i inkurajojnë në mënyrë të posaçme kristianët. Janë
shenjë ngushëllimi, në një mjedis, ku dëgjohen vetëm lajme të hidhura, të cilat pastaj
arrijnë deri tek Papa. Aktet e dhunës janë tejet të dhimbshme për të gjithë e natyrisht,
më tepër për ne, që jetojmë këtu e i shikojmë me sytë tanë si shkojnë punët, ditë
për ditë. Prej këndej, nuk mund të mos shqetësohesh, e shumë madje, e edhe të frikësohesh,
mbasi kur mendon se dhuna ka arritur kulmin, vjen një kulm tjetër, në vend që të mbyllej
faqja e fundit e këtij ‘libri’ që këtu shkruhet me gjak.
Pyetje: -
Në Damask është ndërmjetësi i OKB-së dhe i Lidhjes Arabe, Kofi Annan, i ngarkuar
për të hartuar planin, falë të cilit nisi armëpushimi, që pastaj, për fat të keq,
nuk u respektua. A ka shpresa për një ndërmjetësim të ri, të frytshëm?
Përgjigje:
- Duhet të vijojë vënia në jetë e planit të Kofi Annan, sepse nuk shikojmë
ndonjë rrugëdalje tjetër. Në se në këto tri-katër javë nuk do të ishin këtu gati 300
vëzhgues, kush e di ç’mund të kishte ndodhur. Ndoshta do të kishte pasur edhe më shumë
dhunë. Dhunë më tragjike. Prandaj duhet mbështetur plani i Kofi Annan me çdo kusht.
Sot Annan u takua me autoritetet, me shoqërinë civile e me liderët fetarë. Duhet vijuar
ecja, edhe me hapa të vegjël, për të arritur suksese sado të vogla; e kjo duhet bërë
me çdo kusht.
Ndërkaq, përmes një komunikate të zëdhënësit të tij, Ahmad
Favzi, Kofi Annan njofton se u takua me presidentin sirian Bashar al-Assad, të cilit
i shprehu shqetësimin e thellë të bashkësisë ndërkombëtare për vijimin e dhunës, duke
theksuar qartë se duhen bërë hapa të guximshme për ta vënë sa më shpejt në jetë planin
e paqes, për t’i dhënë, kështu, fund dhunës e për të arritur në lirimin e kundërshtarëve
të regjimit, me të cilët janë mbushur plot burgjet siriane. Në sa Annan vijon
takimet në Damask, ambasadorët e Sirisë dëbohen nga Britania e Madhe, Franca, Gjermania,
Italia, Spanja, Kanadaja e vende të tjera, në shenjë proteste kundër dhunës së ushtruar
nga regjimi i Damaskut në Hula.