Бэнэдыкт XVI адзначае 35-годдзе біскупскага пасвячэння
28 мая Бэнэдыкт XVI
адзначае 35-годдзе прыняцця біскупскай сакры. Менавіта 28 мая 1977 г. прафесар Рэгенсбургскага
універсітэта кс. Ёзэф Ратцынгер прыняў біскупскае пасвячэнне ў мюнхенскім архікатэдральным
касцёле. Сённяшняя “L’Osservatore Romano” нагадвае словы, якія будучы Папа прамовіў
пасля гэтай цырымоніі 35 гадоў таму: “Наш Мюнхен і наша баварская зямля такія прыгожыя,
бо хрысціянская вера абудзіла ў іх найлепшыя сілы”, - казаў новы арцыбіскуп Мюнхен-Фрайзінга.
Ён адзначаў, што хрысціянская вера, нягледзячы на сваю строгасць, не зрабіла народ
бедным, але наадварот - шчодрым і свабодным. “Калі б у Баварыі перасталі верыць, яна
б згубіла ўласную душу”, - казаў арцыбіскуп Ратцынгер. “L’Osservatore Romano” нагадвае,
што ў адной з сваіх аўтабіяграфій Папа тлумачыў прычыну выбару свайго біскупскага
дэвіза “Cooperatores veritates” (“Супрацоўнікі праўды”): “Я выбраў два словы з Трэцяга
Паслання св. Яна: “супрацоўнікі праўды”, перш за ўсё таму, што мне здавалася яны найбольш
прадстаўлялі працягласць, якая існавала паміж маёй папярэдняй пасадай і новым прызначэннем:
нягледзячы на адметнасці, гаворка ішла аб адным і тым жа – ісці за праўдай і служыць
ёй”. “У той момант, калі ў свеце пытанне “праўды” амаль знікла, бо здаецца вельмі
вялікім для чалавека і без праўды ўсё разбураецца, гэты дэвіз мне здаваўся найбольш
адпаведным нашаму часу, найбольш сучасным у добрым сэнсе гэтага слова”, - прыводзіць
словы будучага Пантыфіка “L’Osservatore Romano”.