Papa: Shën Gjoni i Avilës dhe Shën Hildegarda e Bingen-it do të jenë Doktorë të Kishës.
Në lutjen e djeshme të Mbretëreshës Qiellore, kremtuar pas Meshës së Rrëshajëve, Papa
njoftoi se më 7 tetorin e ardhshëm Shën Gjoni i Avilës dhe Shën Hildegarda e Bingenit
do të shpallen Doktorë të Kishës universale. Në përshëndetjet drejtuar besimtarëve,
mbledhur në Sheshin e Shën Pjetrit, Benedikti XVI u kërkoi të luten për Takimin Botëror
të Familjeve, që do të hapet në Milano, të mërkurën e ardhshme. Dy dëshmitarë të
mëdhenj të fesë: kështu i quajti Benedikti XVI Shën Gjonin e Avilës dhe Shën Hildegardën
e Bingenit, të cilët më 7 tetorin e ardhshëm do të shpallen Doktorë të Kishës, pikërisht
për të shënuar fillimin e Sinodit të Ipeshkvijve kushtuar Ungjillëzimit të ri e hapjen
e Vitit të Fesë, shpallur për të përkujtuar 50-vjetorin e Koncilit II të Vatikanit.
Gjoni e Hildegarda jetuan në epoka e mjedise të ndryshme kulturore, sqaroi Papa, por
shembulli i tyre e mësimi i tyre vijojnë të jenë me vlerë për të gjitha kohët: “Hildegarda
ishte murgeshë benediktine në zemrën e Mesjetës gjermane, mësuese e vërtetë teologjie
e studiuese e thellë e shkencave natyrore dhe e muzikës. Gjoni, prift
dioqezan në vitet e rilindjes spanjolle, mori pjesë në përtëritjen e mundimshme kulturore
e fetare të Kishës e të shoqërisë në agimet e kohëve moderne. Por shenjtëria e jetës
dhe thellësia e doktrinës, i bëjnë përjetësisht aktualë : hiri i Shpirtit Shenjt u
priu në përvojën e kuptimit të thellë të zbulesës hyjnore e të dialogut të urtë me
botën, që përbëjnë horizontin e përhershëm të jetës e të veprimtarisë së Kishës”. Këta
dy Shenjtorë e Doktorë, vijoi Papa, mbeten me vlerë të madhe për çdo kohë e, sidomos,
për kohën tonë: “Edhe në ditët tona, përmes mësimit të tyre, Shpirti
i Zotit të ngjallur vijon ta bëjë të dëgjohet zërin e tij e të ndriçojë rrugën kah
e Vërteta, e vetmja që mund të na bëjë të lirë e t’i japë kuptim të plotë jetës sonë”. Më
pas Ati i Shenjtë u ndalua tek Solemniteti i Rrëshajëve dhe kujtoi fuqinë përtëritëse
të Shpirtit Shenjt: “Shpirti Shenjt, duke vërshuar në histori, fiton mbi
ftohtësinë, i hap zemrat për shpresën, nxit e ndihmon pjekurinë shpirtërore në lidhje
me Zotin e me të afërmin. Shpirti, që foli përmes Profetëve, me dhuratat e urtisë
e të shkencës, vijon t’i frymëzojë burrat e gratë, që impenjohen në kërkim të së vërtetës,
duke u hapur rrugë origjinale të dijes e të thellimit të misterit të Hyjit, të njeriut
e të botës”. Pas lutjes së Mbretëreshës Qiellore, gjatë përshëndetjeve
në gjuhë të ndryshme, drejtuar besimtarëve të shumtë, mbledhur në Sheshin e Shën Pjetrit,
nën një diell të nxehtë veror, Benedikti XVI kujtoi Takimin e madh Botëror të Familjeve,
që do të hapet në Milano, më 30 maj ku, ndonjë ditë më pas, do të jetë i pranishëm
edhe Papa: “Të premten e ardhshme, më 1 qershor, do të shkoj në Milano, ku
do të kremtohet Takimi VII Botëror i Familjeve. I ftoj të gjithë ta ndjekin këtë ngjarje
të madhe e të luten për suksesin e saj”. Nga përshëndetjet, kujtojmë
atë në gjuhën çeke, gjatë së cilës Papa nënvizoi Vitin Jubilar të Shenjtorëve Çirili
e Metodi, që u hap këto ditë në Romë; ndërsa në gjuhën italiane, përshëndetjen
drejtuar Policisë së Shtetit, në 160- vjetorin e themelimit e atë, drejtuar të sëmurëve,
në Ditën e promovimit të mjekimeve për lehtësimin e dhimbjes:“I drejtoj
një përshëndetje të përzemërt Shoqatës Italiane, që i kushtohet Sklerozës multiple
si dhe Fondacionit “Gigi Ghirotti”, duke i vlerësuar lart për impenjimin e tyre në
ndihmë të shumë njerëzve të vuajtur, të cilëve u japin ndihmë e shpresë”.