Papa pret dy delegacione nga Bullgaria e Maqedonia, për festën e Shenjtorëve Cirili
e Metodi.
Benedikti XVI priti sot në dy audienca të ndryshme një delegacion nga Bullgaria, udhëhequr
nga presidenti i ri, Rossen Plevneliev, e një delegacion tjetër nga Maqedonia, udhëhequr
nga kryeministri, Nikola Gruevski. Si çdo vit, dy delegacionet janë prit në Vatikan
me rastin e fesës së bashkë-pajtorëve qiellor të Evropës, Shën Cirili e Metodi, që
sipas kalendarit julian bie sot. Dy Shenjtorët, vëllezër në gjak e në fe, nuk
janë sllavë por ungjillëzues të sllavëve, murg i pari e ipeshkëv i dyti, me prejardhje
nga qyteti grek i Tesalonikut që në shekullin IX ishte pjesë e Perandorisë bizantine,
qenë ungjillëzuesit e parë të Evropës lindore, në mënyrë të veçantë të rajonit të
Panonisë e të Moravisë, të banuara nga popujt sllavë, për të cilët Cirili e shpiku
një alfabet (cirilicën), në të cilin e përktheu Biblën. Pas audiencave të sotme,
sipas traditës shtegtimi i dy delegacioneve vijoi drejt Bazilikës romake të Shën Klementit,
ku ruhet varri i Shën Cirilit, i cili vdiq në Romë pikërisht gjatë shtegtimit të tij
te Papa për t’i dhuruar reliken e Shën Klementit, të cilën e kishte rimarrë në Krimé.
Sivjet, gjatë ceremonisë zyrtare, u përuruar dy vepra arti të ndriçimit realizuar
prej dy artistëve bullgarë, me titullin “Udha e shpresës” e “Zjarri i shpresës”, që
simbolizojnë vazhdimësinë e dritës së fesë e të spiritualitetit të krishterë ndër
shekujt.