Бэнэдыкт XVI падчас агульнай аўдыенцыі: хто моліцца – ніколі не бывае адзін
23 мая Бэнэдыкт XVI
заклікаў вернікаў вучыцца адчуваць у малітве “смак” быцця дзецьмі Божымі. Менавіта
гэтай тэме была прысвечана катэхеза Святога Айца, якую ён прамовіў падчас агульнай
аўдыенцыі на плошчы св. Пятра ў Рыме. “Дух Святы, вялікі настаўнік малітвы, вучыць
нас звяртацца да Бога з цёплымі словамі, клічучы Яго “Абба, Ойча”, - сказаў Папа.
Ён нагадаў, што так звяртаўся да Бога Айца Езус у самыя драматычныя моманты свайго
зямнога жыцця. Бэнэдыкт XVI адзначыў, што Касцёл, з самых першых гадоў свайго існавання
прыняў гэты зварот вельмі блізка да сэрца. “Хрысціянства – гэта не рэлігія страху,
але даверу і любові да Айца, які нас любіць”, - сказаў Пантыфік. Ён нагадаў, што апостал
Павел у сваіх пасланнях заклікаў прыняць Святога Духа, які дапаможа нам устанавіць
сыноўнія адносіны з Богам – “адносіны глыбокага даверу, які бывае у дзяцей”.
“Магчыма
сучасны чалавек не разумее прыгажосці, велічы і глыбокага суцяшэння, змешчанага ў
слове “айцец”, якім мы можам звяртацца да Бога ў малітве, бо сёння постаць бацькі
часта не дастаткова прысутная і пазітыўная ў штодзённым жыцці. Адсутнасць бацькі,
праблема бацькі адсутнага ў жыцці дзіцяці, з’яўляецца вялікай праблемай нашага часу,
таму нам складана зразумець глыбіню таго, што Бог – гэта Айцец для нас”, - сказаў
Пантыфік.
Папа прапанаваў углядзецца ў адносіны Хрыста з Богам Айцом, каб
навучыцца такім адносінам. Ён нагадаў заклік Пана: “любіце ворагаў вашых і маліцеся
за тых, хто пераследуе вас, каб вы сталі сынамі Айца вашага, які ў нябёсах”. Папа
падкрэсліў, што менавіта любоў робіць нас сынамі Божымі. “Бог з’яўляецца любоўю, і
таксама мы, у нашай сыноўскай малітве, уваходзім у гэты ланцуг любові Божай, якая
ачышчае нашы жаданні, нашы паводзіны, пазначаныя закрытасцю, самадастатковасцю, эгаізмам,
уласцівым старому чалавеку”, - звярнуў увагу Бэнэдыкт XVI.
Святы Айцец падкрэсліў,
што айцоўства Бога мае два вымярэнні: што Ён з’яўляецца нашым стварыцелем, і што праз
Езуса Хрыста Ён набыў адну прыроду з намі. Папа адзначыў, што паглыбляць гэта адзінства
з Богам хрысціянін пакліканы на працягу ўсяго свайго жыцця.
“Мы не можам маліцца,
калі ў глыбіні нашых сэрцаў не будзе запісана жаданне Бога, каб мы былі яго дзецьмі.
З таго часу як існуе “homo sapiens”, ён заўсёды знаходзіцца ў пошуку Бога, спрабуе
размаўляць з Ім, бо сам Бог запісаў сябе ў нашыя сэрцы”, - адзначыў Бэнэдыкт XVI.
Папа
падкрэсліў, што малітва Духа Хрыста ў нас, не з’яўляецца толькі нашай асабістай малітвай,
але належыць да ўсяго Касцёла. “Хто размаўляе з Богам – той не адзін. Мы знаходзімся
ў вялікай малітве Касцёла, з’яўляемся часткай вялікай сімфоніі, якую хрысціянская
супольнасць у розных кутках зямлі і ў кожны час узносіць да Бога. Канешне, музыканты
і інструменты розныя, і гэта багацце, але мелодыя праслаўлення адзіная і гарманічная”,
- сказаў Святы Айцец.
Бэнэдыкт XVI адзначыў, што “малітва пад кіраўніцтвам
Святога Духа, які дае нам магчымасць усклікаць “Абба! Ойча!” з Хрыстом і ў Хрысце,
уключае нас у адзіную вялікую мазаіку сям’і Божай, у якой кожны чалавек грае важную
ролю, і глыбока паяднаны з усім”. Папа заклікаў вернікаў адкрыцца на дзейнасць Святога
Духа, каб малітва перамяняла думкі і дзейнасць і рабіла іх усё больш блізкімі да думак
і учынкаў Езуса Хрыста.