Benedikti XVI laikëve katolikë: ndiqni logjikën e dhuratës, ekonomia e politika kanë
nevojë për shërbim pa interes.
“Të ecin përpara me impenjim personal e shoqëror, duke e dëshmuar Ungjillin e dhurimit
e të shërbimit falas”: kjo ishte ftesa, që Benedikti XVI u drejtoi tetëmijë anëtarëve
të Federatës së organizmave të krishtera të shërbimit ndërkombëtar vullnetar (Focsiv),
Lëvizjes kishtare të impenjimit kulturor (Meic) dhe Lëvizjes së krishterë të punëtorëve
(Mcl), me të cilët u takua këto ditë, në Sallën e Palit VI, në Vatikan. Papa i
inkurajoi të pranishmit të vijojnë impenjimin në favor të vëllezërve, duke vënë në
dukje padrejtësitë, duke dëshmuar vlerat mbi të cilat ngrihet dinjiteti i njeriut
e duke promovuar forma të solidaritetit, që favorizojnë të mirën e përbashkët. Ati
i Shenjtë Ratcinger kujtoi edhe se Meic, që sivjet kremton 80-vjetorin e themelimit,
pati lindur si Lëvizje e të diplomuarve të Veprimit Katolik e se, përmes impenjimit
kulturor dhe edukativ, dëshiron të kontribuojë për edukimin e laikëve të krishterë,
të përgatitur në fusha të ndryshme të kulturës, që të japin ndihmesën e tyre në shërbim
të së mirës së përgjithshme të shoqërisë. E pastaj, Focsiv. Federata më e madhe
e organizmave të vullnetariatit ndërkombëtar me frymëzim të krishterë, e pranishme
në Itali me 65 organizata e më se 60 mijë anëtarë e ndihmës, që sivjet kremton 40-vjetorin
e themelimit. Të njëjtën rrugë ka përshkuar edhe Lëvizja e krishterë e punëtorëve,
shoqatë me karakter shoqëror, solidar e vullnetar, që lufton për mbrojtjen e parimeve
të krishtera në jetë, në kulturë, në rendin shoqëror e në ligjshmëri. Tri shoqata
tejet të rëndësishme kishtare, shpjegoi Ati i Shenjtë, historikisht të bashkuara nga
vepra e urtë e shërbëtorit të Zotit, Papës Pali VI, të cilin sot e kujtojmë plot mirënjohje
për shtytjen që u dha këtyre lëvizjeve të suksesshme në gjirin e besimtarëve të krishterë.
Përvjetoret,
vijoi Papa, janë raste të përshtatshme për ta rimenduar rrugën e përshkuar, por edhe
për ta shikuar me vështrim kritik, duke vlerësuar zanafillën historike me syrin e
ngulur tek shenjat e kohës: “Kultura, vullnetariati e puna përbëjnë trinomin
e pandashëm të impenjimit të përditshëm të laikatit katolik, që dëshiron ta bëjë të
dukshme përkatësinë ndaj Krishtit e Kishës së Tij, si në mjediset private, ashtu edhe
në sferën publike të shoqërisë. Besimtari laik e kryen detyrën, që i takon, në njërën
nga këto tri fusha e, në shërbimin kulturor, në veprimtarinë solidare ndaj njeriut
nevojtar e në punë, përpiqet të promovojë dinjitetin njerëzor”. Tri fusha,
me një emërues të përbashkët që, për Papën, kanë një themel të vetëm: “dhurimin e
vetvetes”. Impenjimi kulturor, e sidomos ai shkollor e universitar, që synon të përgatisë
breznitë e reja, shkon përtej transmetimit të nocioneve teknike e teorike: kërkon
dhurimin e vetvetes me fjalë e me shembull. Vullnetariati, burim i pazëvendësueshëm
i shoqërisë, nuk kërkon aq të japësh gjëra, por më shumë, të dhurosh vetveten, përmes
ndihmës konkrete, që i jepet njeriut nevojtar. Së fundi, puna, që nuk është thjesht
mjet fitimi individual. Papa e shikon si çast, në të cilin shprehen aftësitë, përmes
kontributit, me frymën e shërbimit, në veprimtaritë profesionale të të gjitha llojeve,
duke nisur nga puna e krahut, tek ajo bujqësore, nga ajo shkencore tek ajo kulturore,
pa kujtuar këtu gamën e pafundme të veprimtarive njerëzore. Por, për anëtarët e
lëvizjeve, nënvizoi Papa, ky mision ka një ngjyrim të veçantë, atë të krishterë: “Veprimtaria
juaj duhet të frymëzohet nga dashuria e krishterë: e kjo do të thotë ta shikosh jetën
me sytë e Krishtit e t’i japësh tjetrit shumë më tepër se sendet e domosdoshme për
jetën fizike; t’i dhurosh një shikim, një gjest dashurie për të cilin ka aq shumë
nevojë. E kjo lind nga dashuria, që vjen nga Zoti, i cili na desh i pari; lind nga
takimi i thellë me Të”. Është, pra, logjika e dhurimit, logjikë shpesh
e nëpërkëmbur që, u tha Papa të pranishmëve në Sallën e Palit VI, ju e vlerësoni dhe
e dëshmoni. E kjo do të thotë: “Të dhurosh kohën tënde, aftësitë e kompetencat
tuaja, përgatitjen tuaj profesionale; me një fjalë, t’i kushtosh vëmendje tjetrit,
pa pritur shpërblim në këtë botë. E unë ju falënderoj për këtë dëshmi të madhe. Duke
vepruar kështu, jo vetëm që i bëni mirë tjetrit, por gjeni edhe lumturinë e thellë,
sipas logjikës së Krishtit, që na dhuroi gjithë vetveten”. Një dashuri
pa interes, kjo që kujtoi Benedikti XVI, përvoja e së cilës fitohet kryesisht në familje: “Kur
kjo nuk ndodh, ajo e humbet natyrën e vet, hyn në krizë. Kur jetohet në familje, dhurimi
pa kushte për të mirën e tjetrit është çast edukativ, themelor për të mësuar si duhet
të jetojë i krishteri edhe në lidhje me kulturën, me vullnetariatin, me punën”. Koncept
ky, që e gjejmë tek Enciklika “Caritas in Veritate”, në të cilën Papa kujton modelin
familjar të logjikës së dhurimit edhe në përmasën universale; vetëm drejtësia nuk
mjafton, nëvizon Papa, pa dhurim, nuk mund të ketë drejtësi të vërtetë. Mësim i
madh ky i Benediktit XVI, që i kujton botës se: “Gjithsesi, si ekonomia,
ashtu edhe politika, kanë nevojë për dhurim, për njerëz me aftësi dhurimi reciprok”.