“L’Osservatore Romano”: невялікі штодзённы нарцызм
Сённяшняя “L’Osservatore
Romano” перасцерагае ад палону сусветнага сеціва. Электронныя інструменты паставілі
ў цэнтр “сусвету” наша “эга”, адзначае аўтар артыкула ў ватыканскай газеце Крысціан
Марціні Грымальдзі. “Калісьці мы збіралі ў альбомы наклейкі, на якіх былі нашы спартыўныя
чэмпіёны, любыя каманды”, - піша ён. Нармальная схільнасць да калекцыяніравання, мець
і захоўваць асабліва каштоўны экзэмпляр цукерачнай абёрткі ці нечага іншага, была
нагодай да кантакту з іншымі.
Цяпер мы падмянілі самімі сабой ранейшыя абёрткі.
Ліхаманкавая пагоня за ўсё новымі онлайн-магчымасцямі, якім няма і не будзе канца,
радасць ажно да “гускавай скуры” пры чарговым абнаўленні нашага віртуальнага альбому,
“падсажвае” нас на пэўную залежнасць; мы ўвесь час чакаем на “новую дозу” увагі з
боку амаль што цэлага свету да нашай так любай персоны. “Ад аднаго абнаўлення да другога,
углядаючыся ў новыя фота, мы з тужлівай надзеяй чакаем, што як найбольшая колькасць
карыстальнікаў клікне на наша жыццё”, - піша Грымальдзі.
А калі цікавасць
да нас як сродкаў – у рамках мадэлі “выкарыстай і выкінь” – падае, мы адчайваемся.
“Дык можа лепш зусім не пачынаць?” – задаецца пытаннем Крысціян Грымальдзі.