Benedikti XVI Veprave Misionare Papnore : fushatë botërore e Rruzares për ungjillëzimin.
Në ditët tona, misioni ka nevojë për lutje më të shpeshta: këtë pohoi Benedikti XVI
në audiencën e sotme, në Vatikan, duke pritur përfaqësuesit e Veprave Misionare Papnore
(Pom), kryesuar nga prefekti i Kongregatës ‘Propaganda Fide’, kardinali Fernando Filoni.
Papa inkurajoi projektin e Kongregatës për Ungjillëzimin e Popujve, që parashikon
organizimin e fushatës së Rruzares, për t’i dhënë nxitje të re kumtimit të Ungjillit.
Ripohoi, më pas, se çdo njeri e çdo popull ka të drejtë ta marrë lajmin e mirë, Ungjillin
e së vërtetës.
Misioni sot
ka nevojë ta përtërijë besimin në veprimin e Zotit, ka nevojë për lutje më të dendura:
këtë nënvizoi Benedikti XVI, që e inkurajoi me kënaqësi projektin e Kongregatës për
Ungjillëzimin e Popujve dhe të Veprave Misionare Papnore, për të dhënë ndihmesën e
tyre në Vitin e Fesë: “Ky projekt parashikon një fushatë botërore që, përmes
lutjes së Rruzares Shenjte, të shoqërojë veprën e ungjillëzimit në Botë e, për shumë
të pagëzuar, rizbulimin dhe thellimin e fesë”. Papa kujtoi se kumtimi i
Ungjillit shpesh herë shoqërohet me vështirësi e vuajtje. Edhe në këtë fazë ndryshimesh
politike, ekonomike e kulturore, vërejti Shenjtëria e Tij, lajmëtarët e Ungjillit,
që kumtojnë shpresën e paqen, vijojnë të ecin në udhën e Kalvarit, duke u persekutuar,
ashtu si Zoti: “Por, pavarësisht nga problemet dhe realiteti tragjik
i persekutimit, Kisha nuk e humbet guximin, mbetet gjithnjë besnike ndaj mandatit
të Zotit të vet, me vetëdijen se, ashtu si gjithnjë në historinë e krishterë, martirët,
domethënë dëshmitarët, janë të panumërt e të domosdoshëm në udhën e kumtimit të Ungjillit”. Ripohoi,
në vijim, se Jezusi, “fytyra njerëzore e Hyjit”, duhet të jetë gjithnjë qendra e kumtimit
në veprimtarinë misionare të ungjillëzimit. Çdo njeri e çdo popull, shtoi Papa, ka
të drejtë ta marrë Ungjillin e së vërtetës: “Ungjillëzimi, që ka gjithnjë
karakter urgjent, në këto kohë e nxit Kishën ta shpejtojë hapin nëpër udhët e botës,
për ta ndihmuar çdo njeri ta njohë Krishtin”. Vetëm në të Vërtetën, që
është vetë Krishti, kujtoi Papa, njeriu mund të zbulojë kuptimin e jetës, të gjejë
shpëtimin, të rritet në drejtësi e paqe. Së fundi u drejtoi fjalë inkurajimi të gjithë
atyre, që impenjohen në vijën e parë të frontit, në përpjekjen për gjallërimin e
veprimtarisë misionare dhe për formimin e misionarëve. Papa i porositi: “Të
jini gjithnjë shprehje e dukshme e konkrete e bashkimit të njerëzve e të mjeteve ndërmjet
Kishave që, si enë kumunikuese, jetojnë të njëjtën thirrje e të njëjtin tension misionar
e, në të katër anët e tokës, punojnë për të mbjellur Fjalën e së Vërtetës në të gjithë
popujt e në mbarë kulturat”.Në përfundim, Benedikti XVI i ngushëlloi të pranishmit
për humbjen e atë Masimo Çençit, zëvendës-sekretar i ‘Propaganda Fide”, që ndërroi
jetë papritmas mbrëmë. Zoti, tha Papa, ia shpërbleftë për gjithë punën, që ka bërë
në mision e në shërbim të Selisë së Shenjtë.