Ватыканскі іерарх: над з’яўленнем грэка-каталіцкай іерархіі ў Беларусі – трэба думаць
10 мая завяршыўся
візіт у Беларусь арцыбіскупа Кірыла Васіля – сакратара Кангрэгацыіі па справах Усходніх
Касцёлаў. Ватыканскі іерарх правёў на Беларускай зямлі 4 дні, сустракаўся з каталіцкім
духавенствам абодвух абрадаў, маліўся за ахвяр Другой Сусветнай вайны ў мемарыяльным
комплексе “Хатынь”, пазнаёміўся з жыццём грэка-каталіцкіх супольнасцяў, судзіць аб
якім можна з двух бакоў: у адносінах да знешняй структуры – а гэта наяўнасць касцёлаў,
інстытутаў і ўстаноў – Грэка-каталіцкая Царква ў Беларусі вельмі слабая. Але ўразіла
іерарха духоўнае жыццё – як паведаміў на прэс-канференцыі сам арцыбіскуп Васіль. “Другі
ўзровень жыцця Касцёла – гэта ўзровень жыцця веры, жыцця ў сям’і, жыцця ў сумленні,
жыцця асабістага перажывання веры. І на гэтым узроўні Касцёл у Беларусі зрабіў вельмі
вялікі крок наперад, бо гэта Касцёл, які адрадзіўся з попелу. (...) Гэта цуд, што
пасля доўгага часу пераследу, адбываецца аднаўленне Каталіцкага Касцёла і Праваслаўнай
Царквы ў Беларусі. Гэта знак таго, што Касцёл жывы. Таксама на ўзроўні сацыяльнага
жыцця трэба дадаць, што Касцёл разглядаюць як партнёра і гэта вельмі пазітыўна”, -
адзначыў ватыканскі іерарх.
На пытанне аб з’яўленні іерархічных структур у
беларускай Грэка-Каталіцкай Царкве, арцыбіскуп Васіль адказаў, што над гэтым трэба
думаць, хоць рашэнне і не знаходзіцца ў прамой кампетэнцыі Кангрэгацыі па справах
Усходніх Цэркваў. Пытанне будзе абмяркоўвацца з Дзяржсакратарыятам Апостальскай Сталіцы,
Папскай радай спрыяння хрысціянскаму адзінстсву, з каталіцкімі іерархамі Беларусі
і Апостальскім нунцыем. На канференцыі для святароў, прысвечанай ролі Усходніх
Цэркваў у Сусветным Касцёле, ватыканскі іерарх шмат казаў пра адносіны паміж канфесіямі
– Кангрэгацыя надае вялікую ўвагу гэтаму пытанню.
Арцыбіскуп Васіль адзначыў,
што экуменізм не павінен быць фармальным, на паперы ці ў афіцыйных сустрэчах, трэба
перанесці яго ў сваё штодзённае жыццё праз любоў да кожнага чалавека. Такі быў матыў
сустрэчы арцыбіскупа з кіраўніком Беларускай Праваслаўнай Царквы Мітрапалітам Мінскім
і Слуцкім Філарэтам, якая адбылася перад самым ад’ездам ватыканскага іерарха.