Benedikti XVI seminaristëve spanjollë të Romës: të jeni njerëz të Krishtit, të ndershëm
e të thjeshtë
Të jeni dëshmitarë të ndershëm të Krishtit: kjo është detyra, që u la Benedikti XVI
studentëve të Kolegjit Papnor Spanjoll të Shën Jozefit, të cilët i priti sot në Vatikan.
Rasti qe 50-vjetori i ngritjes së selisë aktuale të Kolegjit dhe festa liturgjike
e Shën Gjonit të Avilës, pajtor i klerit shekullar spanjoll, që së shpejti, do të
shpallet Dijetar i Kishës. Shembullin e shenjtorit përmendi Papa, ndërsa u thoshte
seminaristëve se ç’do të thotë të jetosh brenda mureve të konviktit historik: “Të
ftuar në Romë për të vazhduar studimet meshtarake, duhet menduar jo aq për interesin
personal, sa për shërbimin ndaj popullit të Zotit, i cili ka nevojë për barinj të
përgatitur e të aftë, të përkushtuar në punën e mrekullueshme për shenjtërimin e besimtarëve”.
Kujtohuni gjithmonë, i porositi seminaristët Benedikti XVI, se meshtari e përtërin
jetën dhe merr forcë për shërbimin e vet nga kundrimi Fjalës së Zotit dhe nga dialogu
me Hyjin: “Ai është i vetëdijshëm për faktin se nuk mund t’u çohet Krishti vëllezërve,
nuk mund të gjendet tek të varfërit e tek të sëmurët, nëse nuk zbulohet më parë tek
lutja e zjarrtë dhe e vazhdueshme. Janë të nevojshme marrëdhënie personale me Atë,
që e shpallim, e kremtojmë dhe e komunikojmë. Këtu qëndron themeli i përshpirtërisë
meshtarake: të arrish të bëhesh shenjë e dukshme dhe dëshmi e gjallë e Bariut të Mirë”.