У Беларусі з візітам
знаходзіцца высокі прадстаўнік Апостальскай Сталіцы – арцыбіскуп Кірыл Васіль. Іерарх
з’яўляецца сакратаром Кангрэгацыі па справах Усходніх Цэркваў – па сутнасці другі
чалавек у гэтай установе. Арцыбіскупа Кірыла запрасілі Міністэрства замежных спраў
і грэка-каталіцкая супольнасць Беларусі. Учора вечарам вернікі і духавенства сустрэлі
высокага госця ў мінскай парафіі св. Язэпа. Каб прывітаць усіх, іерарху нават перакладчык
не спатрэбіўся – ён добра ведае рускую мову. “Гэта для мяне першая магчымасць наведаць
Беларусь, наведаць Каталіцкі Касцёл, які жыве тут у двух абрадах – заходнім і ўсходнім.
Гэта мае першыя моманты, першыя гадзіны ў Беларусі, я вельмі рады гэтым сустрэчам”,
- заявіў іерарх нашаму радыё.
У капліцы душпастырскага цэнтра св. Язэпа арцыбіскуп
Васіль узначаліў малебен за горад Мінск. У ім прынялі ўдзел таксама Апостальскі нунцый
у Беларусі арцыбіскуп Клаўдыё Гуджэроцці, Мітрапаліт Мінска-Магілёўскі Тадэвуш Кандрусевіч,
Біскуп Віцебскі Уладзіслаў Блін. Асаблівую ўвагу Кангрэгацыя па справах Усходніх Цэркваў
надае развіццю экуменічнага дыялога. Таму акрамя каталіцкага духавенства, падчас свайго
візіту ў Беларусь, ватыканскі іерарх сустрэнецца з кіраўніком Беларуская Праваслаўнай
Царвы – Мітрапалітам Мінскім і Слуцкім Філарэтам. Але галоўнае ўсё ж – супольная малітва
з вернікамі, адзначыў апостальскі візітатар для грэка-католікаў Беларусі архімандрыт
Сяргей Гаек.
“Нашым першым іерархам пасля Папы з’яўляецца кардынал Леанарда
Сандры – прэфект Кангрэгацыі, а яго намеснік – Уладыка Кірыл, і гэта вельмі важна.
А для вернікаў – гэта духоўны вопыт, але духоўны вопыт, які ўпісваецца ў вопыт нашага
жыцця, нашай гісторыі, сучаснасці і будучыні”, - падкрэсдіў архімандрыт.
Сёння
арцыбіскуп Кірыл у Слоніме ўзначаліў акафіст перад іконай Жыровіцкай Маці Божай –
напярэданні, 7 мая, тут адзначылі дзень памяці гэтай святыні. Потым іерарх адправіўся
ў Івацэвічы, каб цэлебраваць памінальную літургію. У 1942 г. фашысцкія карацелі спалілі
жыхароў некалькіх вёсак у парафіі Баброўнікі, арыштавалі грэка-каталіцкага экзарха
Антона Неманцэвіча, які потым прыняў мучаніцкую смерць у турме. Заўтра, 9 мая, арцыбіскуп
Васіль прыме ўдзел у малебне ў Хатыні за ахвяр ІІ Сусветнай вайны.