Shqipëria në fund të listës për kujdesin e treguar për nënat
Lajmi i mirë është se Shqipëria bën pjesë në listën e vendeve të zhvilluara. I keqi,
se është në fund të saj. Kështu del nga raporti i organizatës “Save the children”
(Shpëtoni fëmijët), publikuar sot, i cili i referohet gjendjes së nënave në vitin
2011. Tirana është e 43-ta në listën me 43 vende, pas Maqedonisë, pas Bosnjë-Hercegovinës,
pas Serbisë e pas Rumanisë. E i njëjti vend i takon Shqipërisë edhe përsa i përket
gjendjes së grave në përgjithësi dhe gjendjes së fëmijëve. Raporti u bë i njohur vetëm
pak ditë para së dielës, 13 maj, Festë e Nënës në të gjithë botën. Të bën përshtypje
niveli i vdekshmërisë së nënave në Shqipëri, në vend të dytë pas SHBA-ve. Një nënë
ndër 1700 ka mundësi të humbë jetën gjatë shtatzanisë. E vitet e shkollës, që frekuenton
një femër janë vetëm 11, numri më i ulët në krahasim me të gjitha vendet e tjera.
Ndërsa përqindja e pjesëmarrjes së grave në parlament është 16%, në krahasim me vende
si Maqedonia, ku kjo përqindje rritet në 33 e si Serbia me 22%. Më keq është vetëm
Rumania, me 10%. Norvegjia është e para në këtë klasifikim, e distancuar dukshëm nga
të tjerët, me një tregues, që vë në dukje rolin dhe kujdesin, që tregohet për nënat
në atë shoqëri.