Новыя члены Швейцарскай гвардыі прынялі прысягу вернасці Святому Айцу
6 мая 26 рэкрутаў
Швейцарскай гвардыі ўрачыста прысягнулі “служыць дакладна, сумленна і высакародна”
папе Бэнэдыкту ХVI і яго наступнікам. Прысяга новых членаў Папскай гварыді праходзіць
кожны год 6 мая- у памяць швейцарскіх салдатаў, якія падчас захопу і разрабавання
Рыма 6 мая 1527 г. войскамі імператара Карла V, сталі ў абароне тагачаснага папы
Клімента VII. Падчас абароны Пантыфіка загінулі 147 гвардзейцаў. З тых часоў ў памяць
аб гэтай падзеі навабранцы гвардыі прымаюць прысягу 6 мая – у Дзень швейцарскай гвардыі.
Кардынал
Дзяржсакратар Тарчызіо Бэртонэ у памяць загінуўшых абаронцаў папы Клімента VII узначаліў
св. Імшу ў базыліцы Святога Пятра, у якой прынялі ўдзел новыя члены Швейцарскай гвардыі.
У сваёй гаміліі іерарх звяртаючыся да навабранцаў Папскай гвардыі спаслаўся на фрагмент
з Евангелля, у якім Езус кажа: “Гэтым будзе ўслаўлены Айцец Мой, калі вы прынясеце
багаты плён і станеце Маімі вучнямі” (Ян 15,8). “Таксама і вы, што жывеце ў цэнтры
Касцёла, пад купалам Св.Пятра, значыць у асаблівай блізкасці са Святым Айцом, якому
прысягнулі вернасць, таксама пакліканы прынесці багаты плён”.- сказаў кардынал Бэртонэ.
Іерарх адзначыў, што гэты заклік нагадвае нам, што шлях веры, сяброўства з Езусам
і прыналежнасць да Касцёла, ніколі не мае канца. “На сваім шляху вучні могуць сутыкнуцца
з цяжкасцямі і няўдачамі, ад якіх павінны падняцца і працягваць свой шлях, заўсёды
будучы вучнямі Хрыста”, - сказаў іерарх. Кардынал Бэртонэ пажадаў усім гвардзейцам,
каб “іх адзіным клопатам было адзінства з Езусам і тады яны будуць упэўненымі ў тым,
што прынясуць багаты плён”.