Беларусь наведае сакратар Кангрэгацыі па справах Усходніх Касцёлаў
7-10 мая Беларусь
наведае сакратар Кангрэгацыі па справах Усходніх Касцёлаў арцыбіскуп Кірыл Васіль.
У праграме візіта іерарха сустрэчы з каталіцкімі біскупамі і вернікамі Беларусі, як
лацінскага так і візантыйскага абраду. Акрамя таго арцыбіскуп Васіль сустрэнецца з
Патрыяршым Экзархам усяе Беларусі Мітрапалітам Мінскім і Слуцкім Філарэтам. Запланавана
таксама сустрэча з прадстаўніком свецкіх уладаў – намеснікам міністра замежных спраў
Рэспублікі Беларусь, паслом Рэспублікі Беларусь пры Апостальскай Сталіцы Сяргеем Алейнікам.
У дні калі Беларусь святкуе Дзень Перамогі і ўзгадвае шматлікіх ахвяраў вайны, Каталіцкі
Касцёл адзначае 70-годдзе мучаніцкага подзьвігу жыхароў рэгіёнаў Палесся і Слонімшчыны,
спалення нацыстамі вёсак грэка-каталіцкай парафіі Бабровічы і арышту Апостальскага
Экзарха грэка-католікаў Беларусі Антона Неманчэвіча з Таварыства Езуса. Падчас свайго
візіта арцыбіскуп Васіль памоліцца на месцах пакутніцтва знішчаных супольнасцей, паведамляе
партал Каталіцкага Касцёла ў Беларусі catholic.by, са спасылкай на Апостальскую нунцыятуру
ў Беларусі. Акрамя таго, адзначаецца, што іерарх правядзе ў Мінску канферэнцыю на
тэму “Значэнне хрысціянскага Усходу для Паўсюднага Касцёла”.