Paraqiten përfundimet e plenares së Akademisë Papnore të Shkencave Shoqërore, kushtuar
‘Pacem in Terris”.
Pranë Sallës vatikanase të Shtypit, u paraqitën përfundimet e punimeve të mbledhjes
së 18-të plenare të Akademisë Papnore të Shkencave Shoqërore, përqendruar tek analiza
e parimeve të Enciklikës “Pacem in Terris”, 50 vjet pas botimit.
Enciklika
‘Pacem in Terris’ vijon të jetë, edhe sot e kësaj dite, një nga bazat e Doktrinës
shoqërore të Kishës. E vërteta, liria, solidariteti e drejtësia, janë parimet kryesore
të dokumentit të Gjonit XXIII, që akoma sot, pas 50 vjetësh, e ndihmojnë njeriun të
orientohet në vorbullën e shenjave të kohës. Imzot Roland Minnerath, ipeshkëv
i Dizhonit, një nga themeluesit e Akademisë Papnore, vuri theksin mbi rëndësinë e
zhvillimit shoqëror e shkencor, që nuk mund të ketë kurrfarë vlere, në se nuk e vë
në qendër të vëmendjes njeriun. E ky parim ka rëndësi të veçantë në kohët tona, të
tronditura thellë nga kriza, që ka përfshirë botën e globalizuar, shpjegoi imzot Sànchez
Sorondo, kancelar i Akademisë Papnore të Shkencave Shoqërore. I vënë në jetë me sukses,
mund të krijojë një rend të ri global, për t’i siguruar botës paqen. Paqja, e
kuptuar si pasuria më e madhe e përbashkët, nuk mund të realizohet nga subjektet e
sotme, që drejtojnë globalizimin, siç janë, për shembull, tregjet, shpjegoi profesoresha
Margaret Archer e Shkollës së Lartë Politeknike të Lozanës, anëtare e Akademisë Papnore
të Shkencave Shoqërore. Kultura dhe informacioni, u theksua në përfundim, janë dy
elemente themelore për zhvillimin pozitiv të shoqërive të reja. Prej këndej, përhapja
e kulturës duhet parë si bazë e zhvillimit dhe e përpjekjeve për ndërtimin e një
shoqërie më njerëzore, tokë pjellore, kjo, edhe për ungjillëzimin e ri.