Бэнэдыкт XVI падчас агульнай аўдыенцыі паразважаў аб малітве св. Стэфана
Першаму хрысціянскаму
мучаніку св. Стэфану, прысвяціў сваю катэхезу Бэнэдыкт XVI падчас агульнай аўдыенцыі,
якая прайшла 2 мая на плошчы св. Пятра ў Рыме. Папа адзначыў, што ў момант яго мучаніцкай
смерці, аб якой нам вядома дзякуючы Дзеям Апосталаў, адкрылася блізкая сувязь паміж
Божым Словам і малітвай. Пантыфік нагадаў, што св. Стэфан, быў абвінавачаным судом
сінэдрыёна ў тым, што казаў аб Езусе, які зруйнуе ерусалімскую святыню і “зменіць
звычаі, якія перадаў Майсей”. У адказ св. Стэфан звярнуўся да суддзяў з прамовай,
у якой тлумачыў прароцкія словы Хрыста, які сам з’яўляецца новай святыняй, пачаў новы
культ, і замяніў, праз сваю крыжовую ахвяру, старажытныя ахвяраванні. “Ён пераказаў
такім чынам усё біблійнае апавяданне, увесь шлях змешчаны ў Святым Пісанні, каб паказаць,
што ён вядзе на “месца” канчатковай прысутнасці Бога, якім з’яўляецца Езус Хрыстус,
а асабліва Яго мука, смерць і ўваскрасенне. У гэтай перспектыве Стэфан таксама бачыў,
сэнс свайго быцця вучнем Езуса, наследуючы Яго аж да мучаніцтва.”, - сказаў Святы
Айцец.
Бэнэдыкт XVI адзначыў, што ў сваёй прамове св. Стэфан расказаў аб Абрагаме,
які пакінуў сваю зямлю, Юзафе, прададзеным братамі і “такім чынам дайшоў да Майсея,
які стаў прыладай Бога для вызвалення свайго народа, але таксама шмат разоў сустракаў
адмаўленне з боку сваіх людзей”. “У гэтых падзеях апісаных у Святым Пісанні,(...)
заўсёды праяўляецца Бог, які не стамляецца ісці насустрач чалавеку, нягледзячы на
тое, што часта сустракаў адчайны супраціў. І гэта ў мінулым, цяпер і ў будучыні”,
- сказаў Папа.
Бэнэдыкт XVI адзначыў, што св. Стэфан, разважаючы аб дзейнасці
Бога ў гісторыі збаўлення, заўсёды ўзгадваў аб спакусах адкінуць Бога і яго дзейнасць,
але адначасова сцвярджаў, што Езус – гэта той Справядлівы, аб якім казалі прарокі.
“У Хрысце сам Бог стаў прысутны адзіным і галоўным чынам: Езус – гэта “месца” сапраўднага
культа”, - сказаў Святы Айцец. Папа адзначыў, што Стэфан указаў судзям на Хрыста як
на новую святыню ў якой жыве Бог, які узяў на сябе грахі чалавецтва, каб “спаліць
у сваёй любові”.
“Жыццё і прамова Стэфана раптоўна абарваліся каменаваннем,
але менавіта яго мучаніцтва з’яўляецца спаўненнем яго жыцця і паслання: ён стаў адным
з Хрыстом”. Папа падкрэсліў, што апошнія словы Стэфана таксама гучалі ў гармоніі з
апошнімі словамі Пана: ён даверыў сваю душу Богу і прасіў аб прабачэнні для сваіх
забойцаў.
“Дарагія браты і сёстры, сведчанне св. Стэфана дае нам некаторыя
парады для нашай малітвы і жыцця. Мы можам спытаць саміх сябе: адкуль гэты першы мучанік
ўзяў сілы, неабходныя, каб адказваць тым, хто яго пераследваў і дайсці да дара самаго
сябе? Адказ просты: ад яго адносін з Богам, яго адзінства з Хрыстом, разважання аб
гісторыі збаўлення, бачання дзейнасці Бога, якая ў Езусе Хрысце дасягнула сваёй вышыні.
Таксама і наша малітва павінна натхняцца слуханнем Божага Слова, у адзінстве з Езусам
і Яго Касцёлам”, - сказаў Бэнэдыкт XVI.
Папа адзначыў, што малітва вернікаў
па прыкладу св. Стэфана таксама павінна быць сузіраннем Езуса, як Пана нашага штодзённага
існавання. “У Ім таксама і мы, пад кіраўніцтвам Святога Духа, можам звяртацца да Бога,
уступаць у рэальны кантакт з Ім, з даверам дзяцей, якія звяртаюцца да Айца, які іх
любіць да бясконцасці”, - сказаў Святы Айцец.