Sot, më 1 maj, Kisha përkujtoi Shën Jozefin Punëtor. Në Ungjill Jezusi quhet “i
biri i marangozit”. Prej këndej, duke përkujtuar Shën Jozefin, nuk mund të mos kujtojmë
edhe dinjitetin e punës njerëzore, si e drejtë e detyrë, që i krijon njeriut mundësinë
të sundojë mbi gjithësinë, t’i shërbejë bashkësisë, të bashkëpunojë me Zotin në veprën
e Krijimit, të japë ndihmesën e vet në Planin e Shëlbimit. Ky përkujtim liturgjik
u themelua nga Papa Piu XII më 1955, në përkim me festën e punëtorëve, që kremtohet
në mbarë botën më 1 maj. Shën Jozefi është model i punëtorit të zellshëm, që e
mban familjen me djersë të ballit. Është edhe mësuesi i parë i punës për Birin e Zotit,
i cili pikërisht në punishten e tij nisi punën e zakonshme ndërmjet njerëzve, në heshtje,
pa asnjë bujë. Prej këndej, në sa në të katër anët e botës kremtohet festa e njerëzve
të punës, punëtorët e krishterë e nderojnë Marangozin e shenjtë si model e pajtor.
Nën mbrojtjen e tij janë vënë urdhëra e kongregata rregulltare, shoqata e bashkësi
të përshpirtshme, kisha e famulli, meshtarë e laikë, të ditur e të paditur. Ndoshta
pak kush e di se Papa Gjoni XXIII, shpallur prej kohe i Lum, kur u ul në fronin e
Shën Pjetrit, deshi të quhej Papa Jozef, sepse kishte një devocion të thellë për
Marangozin e Shenjtë të Nazaretit. Pastaj iu desh të marrë emrin Gjon, që e patën
25 papë, ndërsa, çuditërisht, asnjë nuk e zgjodhi këtë emër të madh, e njëkohësisht,
të heshtur, të panjohur, Jozef. Emër i një njeriut, që kreu pa bujë, një nga misionet
më të mëdha të historisë së njerëzimit: e mori për dore në hapat e para të jetës mbi
tokë, vetë Zotin, duke u bërë një nga figurat më të spikatura të historisë së shëlbimit. Në
Besëlidhjen e Re kujtohet pak e aspak. Kur Jezusi nisi jetën e tij publike, ai ndoshta
kishte vdekur, gjë që e tregon edhe mungesa përkrah Marisë në Dasmën e Kanës. Nuk
e dimë ku e as kur vdiq. Nuk e dimë as se ku e ka varrin, por vijojmë ta kujtojmë
me epitetin e Ungjillit:“I Drejti”! E sot shtojmë edhe epitetin tjetër, që përkon
me festën: “Njeriu i punës”.