Кардынал Бэртонэ аб неабходнасці змен ў грамадскім жыцці і пераследзе хрысціян
Кардынал Дзяржсакратар
Тарчызіо Бэртонэ сустрэўся з удзельнікамі руху “Аднаўленне ў Святым Духу”, які сабраліся
у Рыміні з нагоды 40-годдзя яго дзейнасці ў Італіі. Форум праходзіць з 28 красавіка
па 1 мая. 29 красавіка Кардынал Бэртонэ узначаліў урачыстую св. Імшу. У сваёй гаміліі
ён заклікаў удзельнікаў руху “не стамляцца сведчыць аб цэнтральным месце Хрыста ў
веры, бо толькі ў ім ёсць збаўленне”. “Ні навука, ні багацці, ні ўлада не дараць збаўлення”,
- адзначыў кардынал Бэртонэ. На заканчэнне сваёй сустрэчы з удзельнікамі руху, іерарх
адказаў на некаторыя пытанні, прысутных на форуме, журналістаў. Ён адзначыў, што аднаўленне
ў Святым Духу павінна несці наступствы для грамадскага жыцця. “Унутранае аднаўленне,
аднаўленне сем’яў - гэта сутнасць аднаўлення – прыняць веру і зрабіць яе крытэрыем
уласных паводзінаў. Вера павінна выражацца ў сацыяльным і грамадскім жыцці. Неабходна
перамяніць, “аднавіць” людзей, але таксама неабодна аднавіць інстытуты і ўсё грамадства”,
- падкрэсліў кардынал Бэртонэ.
Акрамя таго, іерарх пракаментаваў тэрарыстычныя
нападкі на хрысціян, якія адбыліся на працягу апошніх выходных дзён ў Нігерыі і Кеніі.
Іерарх звярнуў увагу на непрыняцце некаторымі краінамі права на рэлігійную свабоду
і відавочны рост насілля. “Мы заклапочаны, таксама таму, што хрысціяне, якія знаходзяцца
ў траншэях свету, у афрыканскіх краінах, на Блізкім Усходзе, з’яўляюцца фактарам раўнавагі
і згоды, а не канфліктаў. Падаецца дзіўным, што такая моцная неталерантнасць і агрэсіўнасць
скіравана супраць тых, хто спрыяе прымірэнню, супакою, справядлівасці і салідарнасці”,
- сказаў кардынал Бэртонэ.