Вялікабрытанія: прынята праграма па дапамозе распазнання паклікання
Дапамагчы маладым
людзям распазнаць сваё пакліканне – такая мэта спецыяльнай трохгадовай праграмы распрацаванай
Біскупская Канферэнцыя Англіі і Уэльса. Натхненнем для праекта сталі словы Бэнэдыкта
XVI скіраваныя да ўніверсітэтскай моладзі падчас яго Апостальскага візіта ў Вялікабрытанію
ў 2010 г.: “Якімі людзьмі вы хочаце быць?”. Каб дапамагчы маладым людзям даць адказ
на гэта пытанне, у парафіях будуць стварацца спецыяльныя групы і праводзіцца спецыяльнае
духоўнае душпастрыства, мэта якога будзе заключацца ў тым, каб дапамагчы кожнаму маладому
чалавеку знайсці сваё пакліканне. “Каталіцкі Касцёл ў Англіі і Уэльсе засяродзіцца
над праблемамі моладзі, якую часта несправядліва крытыкуюць СМІ”, - сказаў арцыбіскуп
Соўтваркскі Пітэр Сміт.
У пасяджэнні англійскага епіскапата ўпершыню прымаў
удзел новапрызначаны Апостальскі Нунцый у Вялікабрытаніі арцыбіскуп Антоніо Меніні.
У сваёй прамове скіраванай да іерархаў ён падкрэсліў неабходнасць вядзення дыялога
з секулярызаваным светам, супрацоўніцтва з яўрэямі і мусульманамі ў сферы абароны
жыцця і інстытута сужэнства. Нунцый заклікаў біскупаў падтрымаць дзейнасць Асабістага
ардынарыята Маці Божай Уолсенгемскай, створанага ў 2011 г. Бэнэдыктам XVI для англікан,
якія пажадалі перайсці ў лона Каталіцкага Касцёла.
Нунцый таксама адзначыў
пазітыўную ролю, што выконвае каралева Вялікабрытаніі, якая адзначае сёлета 60-годдзе
свайго знаходжання на троне. “Ва ўсім што яна робіць, асабліва ў пасланнях на Божае
Нараджэнне, яна сведчыць аб хрысціянскай веры, якая яе натхняе”, - сказаў арцыбіскуп
Меніні.