У Венгрыі школьная рэлігійная адукацыя даверана святарам і катэхетам
У Венгрыі пачаліся
рабочыя сустрэчы прадстаўнікоў урада і хрысціянскіх Цэркваў для практычнага абмеркавання
пытанняў выкладання рэлігіі ў школах. Ужо ад верасня 2013 г., як паведамляе агенцтва
“SIR”, на аснове новага закону аб публічнай адукацыі, вучні пачатковых класаў павінны
будуць наведваць адзін раз у тыдзень урок этыкі або рэлігіі, па выбары. Прычым урокі
рэлігіі будуць весці святары або катэхеты ўсіх афіцыйна зарэгістраваных у Венгрыі
рэлігійных супольнасцяў, што дасць магчымасць бацькам абраць урок рэлігіі той ці іншай
канфесіі або рэлігіі.
Дырэктар аддзела адукацыі Рэфармацкай Царквы Венгрыі
Корнел Папп заявіў журналістам, што на перамовах з прадстаўнікамі Міністэрства адукацыі
краіны разгледжваюцца практычныя пытанні адносна арганізацыі курсаў рэлігійнай адукацыі.
Ён выказаў спадзяванне, што канкрэтныя праграмы будуць гатовы ўжо сёлета.