Сённяшняя “L’Osservatore
Romano” прысвяціла цэлую паласу неабходнасці захавання народамі сваёй гістарычнай
памяці і праўдзівага погляду на мінулае дзеля таго, каб быць глыбока ўкаранёнымі ў
рэальнасці і з надзеяй глядзець у будучыню. У артыкуле пад назвай “У пошуку крытычнай
памяці”, адзначаецца, што ў сучаснай Расіі, пасля падзення камуністычнага рэжыму,
не адбылося “яснага і рашучага асуджэння савецкага перыяду”, што стала перашкодай
для разумення сучаснасці і будучыні. Падкрэсліваецца, што “гістарычная амнэзія” у
Расіі існавала з 1917 г., і з цягам часу набыла характар прызвычаення. Акрамя таго,
звяртаецца ўвага, што ў Савецкім Саюзе існавала “дэманізацыя” сувязі з мінулым, ці
наадварот, “рэінтэрпрытацыя” некаторых падзей ў ключы дамінуючай ідэалогіі, як напрыклад
перагляд асобы цара Івана Грознага ў сталінскі перыяд. Ватыканскае выданне адзначае,
што расійскі дысідэнт Аляксандр Салжэніцын зразумеў, што “бальшавісцкая дыктатура
мела сярод сваіх галоўных мэтаў разбурэнне самасвядомасці народа і такім чынам яго
здольнасці да супраціву”.
У іншым артыкуле, пад назвай “Архіў тэрора”, “L’Osservatore
Romano” паведамляе аб выданні ў Італіі фотаальбома “Жыццё ў адным позірку. Ахвяры
вялікага сталінскага тэрора”. У ім прадстаўлены здымкі людзей, асуджаных камуністычнымі
ўладамі на смяротнае пакаранне. Яны рабіліся ў маскоўскіх турмах, для ідэнтыфікацыі
асуджаных перад растрэлам.
Аўтар выдання, італьянская даследчыца Лучэтта Скарафія,
адзначае, што абліччы людзей, якіх хацелі выкрэсліць з гісторыі, сёння з’яўляюцца
для нас напамінам аб яе трагічных старонках. “Памяць можа служыць як сродак супраць
зла, не толькі працягваючы ўспаміны, але менавіта перашкаджаючы таму, каб яно калі-небудзь
зноў паўтарылася”, - адзначае даследчыца на старонках ватыканскага выдання.