Հայ Գրատպութեան 500 Ամեակին Առիթով Երեւանի Մէջ Բացուեցաւ «Վարք Յաւերժութեան» Յուշարձանը
Երեւանի Տէրեան-Մոսկովեան փողոցներու խաչմերուկին, բացուեցաւ ֆրանսաբնակ քանդակագործ
Դաւիթ Երեւանցիի հեղինակած «Վարք յաւերժութեան» անունը կրող, երեք մեթրանոց պրոնզաձոյլ
արձանը: Արձանը արուեստագէտին՝ Դաւիթ Երեւանցիի նուէրն է Հայաստանին` Հայ գրատպութեան
500 ամեակի եւ Երեւանը համաշխարհային գիրքի մայրաքաղաք հռչակուելու առիթով: Արձանի բացման
արարողութեան ներկայ էր ՀՀ նախագահ Սերժ Սարգսեան, Երեւանի քաղաքապետ Տարօն Մարգարեան,
ՀՀ մշակոյթի նախարար Յասմիկ Պօղոսեան ու բարձրաստիճան անձնաւորութիւններ եւ հիւրեր:
Քանդակին
հեղինակը՝ Դաւիթ Երեւանցի, լրագրողներու հետ ունեցած զրոյցին նշեց, որ արձանը քանդակելու
ընթացքին ան ոգեշնչուած է Եղիշէ Չարենցի ստեղծագործութիւններէն. «Այսօր հայ ժողովուրդը
վերածնունդ է ապրում»,- ըսաւ քանդակագործը: Քանդակը ձուլուած է ռուսաստանաբնակ գործարար
Արթուր Ջանիբեկեանի հովանաւորութեամբ, եւ կը պատկերէ այն ՜՜երկու կիները, որոնք հայերէն
ամենամեծ մագաղաթեայ գիրքը` «Մշոյ ճառընտիր»ը, երկու մասի բաժանելով փրկած են թրքական
եաթաղանէն՝՝:
«Մշոյ ճառընտիր»-ը ունի 660 էջ, ընդհանուր կը կշռէ 28 քիլօ, եւ
պատրաստուած է հորթի կաշիէն: Մագաղաթը գրուած է 1200-1202 թուականներուն` Երզնկայի Աւագ
վանքին մէջ, Բաբերդի տանուտէր Աստուածատուրի պատուէրով: Մատեանը այժմ, կը գտնուի Երեւանի
Մաշտոցի անուան հին ձեռագիրներու հիմնարկ Մատենադարանին մէջ:
Արարողութեան ներկայ՝
ՀՀ մշակոյթի նախարար Յասմիկ Պօղոսեան, իր ելոյթին մէջ նշեց, որ ՜՜հայ կնոջ կերպարը նոյնինքն
այնպիսին է, ինչպիսին այն կանայք էին, որոնք գիրը գերադասեցին հարստութենէն եւ գանձերէն՝՝:
ՀՀ
նախագահ Սերժ Սարգսեան յուշարձանի բացումէն ետք ծաղիկներ դրաւ եւ յարգանքի տուրք մատուցեց
՜՜այն կանանց յիշատակին, որոնք պատկերուած են «Վարք յաւերժութեան» յուշարձանի քանդակին՝՝: