Papa në audiencën e përgjithshme: pa lutje, rrezikohemi të na zihet fryma nën peshën
e sendeve të përditshme
Në audiencën e sotme të përgjithshme, mbajtur në Sheshin e Shën Pjetrit, Benedikti
XVI u ndalua posaçërisht tek baritoria e bamirësisë për nevojtarët, në bashkësinë
e parë të Jeruzalemit. Papa nënvizoi se pa lutjen e përditshme, veprimtaria jonë kthehet
në aktivizëm të thjeshtë. Pohoi, kështu, se çdo hap i jetës sonë, duhet bërë para
syve të Zotit, në lutje.
Çastet e lutjes
dhe veprimtaria bamirëse nuk duhet t’i kundërvihen kurrë njëra-tjerës; këtë nënvizoi
Benedikti XVI i cili, në katekizmin e sotëm, reflektoi për baritorinë e bamirësisë
në bashkësinë e parë të Jeruzalemit. Kur u ndje nevoja për t’i ndihmuar njerëzit e
ligshtë, të varfërit, të vejat, kujtoi Papa, kjo bashkësi zgjodhi shtatë njerëz, të
cilët iu kushtuan diakonisë së bamirësisë, pa e shkëputur kurrë nga lutja. Vuri, kështu,
në dukje, unitetin e thellë ndërmjet lutjes e veprës. Duke kujtuar fjalët e Shën Bernardit,
Papa vërejti se shqetësimet e tepruara dhe ritmet e ethshme të jetës, shpesh herë
e ngurtësojnë zemrën dhe e lëndojnë shpirtin: “Është një qortim i çmuar për
ne, të mësuar siç jemi ta vlerësojmë gjithçka me kriterin e prodhimtarisë e të dobisë.
Pa lutjen e përditshme, të jetuar besnikërisht, veprimtaria jonë zbrazet, humbet shpirtin
e thellë, kufizohet thjesht në aktivizëm që, në fund të fundit, të lë krejt të pakënaqur”. Çdo
hap i jetës sonë, pohoi Benedikti XVI, e çdo vepër, edhe e Kishës, duhet bërë para
syve të Zotit, në lutje, nën dritën e Fjalës së Tij: “Kur lutja ushqehet
nga Fjala e Hyjit, mund ta shikojmë realitetin me sy të rinj, me sytë e besimit në
Zotin, që i flet mendjes e zemrës, duke e ndriçuar me dritë të re udhën tonë në çdo
çast, në çdo rrethanë”. Vetëm nga lidhja e thellë me Hyjin ditë për ditë,
shtoi Papa, lind çdo përgjigje e njeriut ndaj thirrjes së Zotit e i besohet çdo detyrë
në Kishë. Zgjedhja e shtatë diakonëve nga ana e Apostujve, vijoi Papa, na kujton
se duhet ta vëmë gjithnjë në plan të parë lutjen dhe Fjalën e Zotit. Për barinjtë,
vijoi Ati i Shenjtë, kjo është forma më parësore dhe më e çmuar e shërbimit, në dobi
të grigjës, që u është besuar: “Në se mushkëritë e lutjes e të Fjalës së
Zotit nuk e ushqejnë frymëmarrjen e jetës sonë shpirtërore, krijohet rreziku që të
na zihet fryma në mes të mijëra gjërave të përditshme; lutja është frymëmarrja e shpirtit
dhe e jetës”. Papa e përfundoi katekizmin, duke theksuar se edhe kur jemi
në ndonjë skaj të heshtur a në vetminë e dhomës tonë, mbetemi gjithnjë të lidhur
ngushtë me Zotin e me shumë e shumë vëllezër e motra në fe, të shpërndarë në të katër
anët e botës, shpirtërisht të pranishëm në lutjen tonë.