Իտալիոյ Սքաֆաթի-ի Քաղաքային Խորհուրդը Ճանչցած՝ Հայոց Ցեղասպանութիւնը ։
Իտալիոյ Սքաֆաթի-ի քաղաքային խորհուրդը ,Ապրիլ 17-ին միաձայնութեամբ ընդունած է Հայոց
Ցեղասպանութեան ճանաչման մասին որոշումը` «Յարգանքի տուրք մատուցելով 1.5 միլիոն հայ
նահատակներուն յիշատակին եւ զօրակցութիւն յայտնելով հայ ժողովուրդին», այս մասին կը տեղեկացնէ
Արտաքին Գործոց Նախարարութիւնը: Նախապէս Իտալիոյ մօտ Հայաստանի դեսպան Ռուբէն Կարապետեան
այցելած է Սալերնօ նահանգի Սքաֆաթի Scafati քաղաքը (որ ունի 51հազար բնակիչ) ուր հանդիպում
ունեցած է քաղաքապետ ԱնՃելոյ Փասքուալինօ Ալիպերթի-ի հետ (Angelo Pasqualino Aliberti),
ինչպէս նաեւ մասնակցած է քաղաքի պատմական շինութիւններէն մէկուն` Ռէալ Փոլուերիքօ Պորպոնիքոյի
մէջ, Հայոց ցեղասպանութեան 97-ամեակին նուիրուած «Հայ Արուեստագէտները Սքաֆաթիի մէջ»
(Artisti Armeni a Scafati) ցուցահանդէսի պաշտօնական բացման արարողութեան: Քաղաքապետին
հետ տեղի ունեցած զրոյցի ընթացքին դեսպան Կարապետեան քննարկած է Սքաֆաթիի հետ քաղաքային
մակարդակով համագործակցութեան հաստատման, զբօսաշրջութեան եւ առեւտրա-տնտեսական ոլորտներուն
մէջ կապերու զարգացման հնարաւորութիւնները: