Në audiencën e parë të përgjithshme, mbajtur në Sheshin e Shën Pjetrit më 27. 04.
2005 Papa Benedikti XVI pati ripohuar impenjimin e tij si lajmëtar i paqes e i dialogut,
duke u frymëzuar nga urtia e dy paraardhësve të mëdhenj me të njëjtin emër. Një
minister i jetuar në shërbim të paqes e të pajtimit: objektiva të cilat, në emrin
e Benediktit - Pajtorit të Evropës që duhej ungjillëzuar – e të Papës të një Evrope
në buzë të greminës së Luftës së Madhe, gjejnë një sintezë me rrënjët sa në kthesat
e historisë, aq edhe në vlerat e krishterimit. Ati i Shenjtë u shpjegoi besimtarëve
arsyen e zgjedhjes së emrit, që do të shoqëronte misionin e tij si zëvendës i Krishtit,
ashtu edhe emocionet e forta, që nga dita kur Konklavi e zgjodhi Bari universal:
“Desha të quhesha Benedikti XVI për t’u lidhur përsëri shpirtërisht me të
nderuarin Papën Benedikti XV, i cili e udhëhoqi Kishën në një periudhë të trazuar
për shkak të konfliktit të parë botëror. Guximtar e profet i vërtetë i paqes, ai veproi
me trimëri të jashtëzakonshme, së pari për të shmangur dramën e luftës e pastaj për
t’i kufizuar pasojat e saj të kobshme. Dëshiroj të ec në gjurmët e tij, në shërbim
të pajtimit e të harmonisë ndërmjet njerëzve e popujve, me bindje të thellë se e mira
e madhe e paqes është sidomos dhuratë e Zotit, dhuratë e brishtë dhe e çmuar, që i
duhet kërkuar Zotit e duhet mbrojtur e ndërtuar ditë për ditë me impenjimin e të gjithëve”.
Por gati njëmijë vjet më parë, një tjetër Benedikt ndikoi fuqimisht mbi
fatet e Kontinentit të Vjetër: Benedikti nga Norçia, qytezë në Umbria të Italisë.
Me urdhërin e tij murgar – kujtoi Papa, “Patriarku i monakizmit përendimor”, më pas
bashkëpajtor i Evropës, me Çirilin e Metodin, ushtroi një ndikim të pallogaritshëm
në përhapjen e krishterimit në të gjithë Kontinentin. Prandaj–vijoi Ati i Shenjtë-
Shën Benedikti është tepër i nderuar në Gjermani e posaçërisht në Bavari, në tokën
ku kam lindur: “Përbën një pikë themelore referimi për bashkimin e Evropës,
duke na kujtuar fuqimisht se nuk mund të hiqet dorë nga rrënjët e krishtera të kulturës
së saj e të qytetërimit të saj”. Në njërën nga Rregullat e famshme të
tij, Shën Benedikti i këshillon murgjërit sivëllezër “Të mos i kundërvënë asgjë Krishtit”,
një imperativ, ky, që edhe Benedikti XVI e ka bërë të vetin: “Në fillim
të shërbimit tim si pasardhës i Shën Pjetrit, i lutem Shën Benediktit të na ndihmojë
ta ruajmë të patundur qendërsinë e Krishtit në jetën tonë. Ai duhet të zërë vendin
e parë në mendimet tona e në veprimtaritë tona”. E Shën Benedikti nuk
i përket vetëm Evropës, por mbarë botës. Shenjti i Norçies – shpjegoi Benedikti XVI
– ashtu si Abrahami, u bë atë i të gjithë popujve, sepse hapi një shkollë jete e feje,
duke u treguar të gjithëve ku gjinden forcat që mund ta rinojnë botën”. Këto forca
gjinden në Ungjillin e Krishtit. Papa e zgjodhi emrin Benedikt, sepse i do Evropën
dhe Shën Benediktin, Pajtorin e Evropës. Ka mësuar nga Papa i mëparshëm se Evropa
duhet të marrë frymë me të dy mushkëritë, e për këtë Papa Gjon Pali II zgjodhi si
bashkëpajtorë të Evropës edhe Çirilin e Metodin. Evropa duhet ta njohë në tërësi përshpirtërinë
e vet, duhet të bëjë një sintezë, gjë që nuk e ka bërë akoma. Të rizbulojë rrënjët
e krishtera. Prej shtatë vjetësh, Benedikti XVI, në timon të barkës së Kishës Katolike,
e drejton me siguri, në një det plot dallgë, me sytë e ngulur gjithnjë tek Kryqi
i Krishtit