Այս Տարի Եւս Ցեղասպանութեան Տարելիցին 24 Ապրիլին Ցոյցեր Տեղի Պիտի Ունենան Թուրքիոյ
Մէջ:
Թրքական շարք մը հասարակական կազմակերպութիւններ այս տարի եւս բողոքի հաւաքներ պիտի կազմակերպեն
Թուրքիոյ մէջ, նուիրուած Հայկական Ցեղասպանութեան տարելիցին: Ըստ թրքական «Հիւրրիյէթ»օրաթերթին
ցոյցի նախաձեռնողներն են Մարդկային Իրաւունքներու Միութիւնն ու «Ո՛չ ըսէ Ցեղապաշտութեան
» նախաձեռնութեան անդամները: Գլխաւոր ցոյցը տեղի պիտի ունենայ Պոլսոյ կեդրոնական «Թաքսիմ»
հրապարակին վրայ, իսկ Ապրիլ 24էն առաջ, այլ հաւաքներ տեղի պիտի ունենան Թուրքիոյ տարբեր
շրջաններու մէջ: Կազմակերպիչները նշած են, որ սուտը երբե՛ք չի կրնար յաւիտենական ըլլալ,
եւ իրենք կը փափաքին իրականութիւնը բացայայտել: «Հայոց Ցեղասպանութեան ճանաչումը ցեղային,
օրինական, քաղաքական եւ ընկերային ամբողջական պատասխանատուութեան գիտակցութեան արդիւնք
պէտք է ըլլայ», նշած է Մարդկային Իրաւունքներու Միութեան անդամ Տիկին Այշէ Կիւնայսու-ն:
Ան աւելցուցած է, թէ միայն անցեալի ցաւերու գիտակցութիւնը առիթ պիտի ընծայէ աւելի ժողովրդավարական
դարձնելու Թուրքիան: Կազմակերպիչները նաեւ ուշադրութիւն հրաւիրած են անցեալ տարուան Ապրիլ
24ին սպաննուած Պոլսահայ զինուոր Սեւակ Պալըքճիի հարցին վրայ: Երկու հասարակական
կազմակերպութիւնները անցեալին եւս նմանատիպ ցոյցեր կազմակերպած էին Ապրիլ 24ին, Պոլսոյ,
Անգարայի, Իզմիրի եւ Թուրքիոյ այլ շրջաններուն մէջ: