16 красавіка адзначаецца
Сусветны дзень барацьбы з рабствам дзяцей. Гэта праблема з’яўляецца вельмі актуальнай
для многіх краін, бо на сённяшні дзень у свеце жыве больш за 400 млн. непаўналетніх,
якія працуюць ва ўмовах рабства. З нагоды дня барацьбы з выкарыстаннем рабскай дзіцячай
працы спецыяльны зварот апублікавала Канферэнцыя Біскупаў Іспаніі. Паводле іспанскіх
іерархаў дзіцячае рабства сёння найбольш распаўсюджана ў Індыі і Афганістане. У гэтых
краінах дзеці працуюць пераважна у будаўнічай сферы. У Бразіліі дзеці-рабы працуюць
ў вугляных шахтах. У М’янме дзіцячая праца выкарыстоўваецца пры зборы цукровага трыснёга
і іншых сельскагаспадарчых прадуктаў. У Кітаі дзеці-рабы вырабляюць выбуховыя рэчывы,
якія затым выкарыстоўваюцца ў піратэхніцы.
Нагодай для адзначэння Сусветнага
дня барацьбы з рабствам дзяцей стала забойства 12-ці гадовага хрысціянская хлопца
Ікбала Масіха ў Пакістане 16 красавіка 1995 г. Забойства здзейснілі прадстаўнікі арганізаванай
злачыннасці ў той час як ён накіроўваўся ў касцёл. Ікбал Масіх з 4 гадоў працаваў
у тэкстыльнай індустрыі, але здолеў збегчы і стаў сведчыць аб рабстве дзяцей у сваёй
краіне. Ён стаў сусветным сімвалам барацьбы з гэтай заганай.