Pashkët ortodokse: mesazh urimi i Papës Benediktit XVI
Me rastin e Pashkëve ortodokse, që sipas kalendarit julian, u kremtuan dje, Papa u
dërgoi urimet kryebarinjve të Kishave përkatëse. Në mesazhin e tij, Benedikti XVI
citon fjalët, që Engjëlli u tha grave në mëngjesin e ditës së Pashkëve, kur ndodheshin
pranë varrit të Jezusit dhe nuk e gjetën trupin e Tij: “Ju mos u trembni! E di se
kërkoni Jezusin e kryqëzuar! Ai nuk është këtu! U ngjall sikurse tha! Ejani e shikoni
vendin ku qe vënë” (Mt 28, 5-6). Duke u nisur nga kjo, Papa pohon se Ngjallja
e Krishtit është arsye shprese për gjithë njerëzimin, pasi tregon se fjalën e fundit
në ekzistencën e njeriut nuk e ka vdekja, por jeta. Ati i Shenjtë u kujton të krishterëve
se janë të thirrur ta përhapin së bashku, në unitet të plotë, këtë Lajm të Mirë, i
cili do të tingëllojë më me forcë vetëm kur të realizohet lutja, që Jezusi i drejtoi
Atit: “Të gjithë të jenë një gjë e vetme, që bota të besojë” (Gjn 17,21). Në fund,
Papa uron që mesazhi i Pashkëve t’u japë shpresë sidomos të krishterëve, viktima të
dhunës, t’u japë paqe e ngushëllim atyre, të cilët vuajnë nga sëmundjet, nga padrejtësitë,
nga uria e nga varfëria, në çdo anë të botës.