Міністр фінансаў Германіі аб важнасці веры ў жыцці палітыка
На важнасць веры ў
жыцці палітыка звяртае ўвагу ў сённяшнім “L’Osservatore Romano” міністр фінансаў Германіі
Вольфганг Шойбле. Падчас свайго афіцыйнага візіту ў Германію ў мінулым годзе, папа
Бэнэдыкт XVI выступіў з прамовай у Германскім Бундэстагу, якая была выслухана з вялікай
увагай. У пачатку Пантыфік нагадаў дэпутатам адну з самых кранальных біблейскіх гісторый
аб адносінах паміж палітычнай уладай і верай у Бога – малітву Саламона аб мудрасці.
Бог, які з’яўляецца ў сне маладому цару, запрашае яго да сфармулавання нейкай просьбы.
У адказ Саламон не просіць Бога аб багацці, уладзе або доўгіх гадах жыцця, але аб
“сэрцы разумным, каб судзіць Твой народ і адрозніваць дабро ад зла” (1 Вал 3, 9).
Калі
б мне давялося адказваць на пытанне пра сэнс хрысціянскай веры ў жыцці сучаснага грамадства,
асабліва ў жыцці палітыкаў, - піша нямецкі міністр фінансаў, - я перш за ўсё адзначыў
бы веру ў Бога. Бо праз гэтую веру наша жыццё набывае спасылку на інстанцыю вышэйшую
за нас, інстанцыю, якую мы не дастасоўваем да нашых густаў, і таму, перад якой мы
павінны апраўдаць усе нашы дзеянні. Аб гэтай спасылцы нагадаў Бэнэдыкт XVI, калі казаў
пра просьбу Саламона аб разумным сэрцы. Чаму гэта так важна? - задаецца пытаннем Шойбле.
Вера
ў Бога выражае асабліва моцна адчуванне, што ёсць межы. Незалежна ад таго, якое значэнне
мы прыпісваем сабе, незалежна ад таго, якой была наша роля ў грамадстве, эканоміцы,
навуцы ці палітыцы, незалежна ад нашых дасягненняў і вынікаў, вера ў Бога кажа нам,
што ёсць нешта і Нехта, хто ёсць перад намі і над намі, - заключае ў сваіх разважаннях
у ватыканскім выданні міністр фінансаў Германіі.