E diel 15 prill, Kisha kremton të Dielën e dytë të Pashkëve dhe festën e Mëshirës
Hyjnore. Gjithnjë më 15 prill kalendari kishtar përkujton edhe shën Abondin, Damianin
De Vuester, Maronin. Këta na mësojnë se kulmi i dashurisë për Zotin është t’ua dhurosh
të tjerëve gjithë vetveten me dashuri. Të hënën më 16 prill do të përkujtohen
shën Maria Bernardeta Soubiroues, virgjër, e Benedikti Jozef Labre. Në liturgjinë
e festës së tyre, Jezusi na përsërit se dëshiron të mbretërojë në zemrat tona, duke
na larguar nga shpirti çdo trazim. Të martën më 17 prill , kalendari Kishtar
përkujton shën Simeonin, ipeshkëv e martir, Robertin, abat. Këta shenjtorë na ftojnë
të shkojmë me gëzim në shtëpinë e Zotit e të kujtojmë se i krishteri është i thirrur
të sjellë fryte vëllazërimi, dashurie e shenjtërie, gjithnjë i mbështetur në hirin
e Zotit. Të mërkurën më 18 prill kalendari kishtar përkujton shën Galdinin,
kryeipeshkëv i Milanos e kardinal. Të krishterët e vërtetë do të urrehen ose do të
kundërshtohen gjithnjë. E ka parafolur vetë Jezusi, që është e Vërteta, por kush do
të vijojë të ecë në rrugën e Tij, do të shëlbohet. Të enjten më 19 prill,
kalendari kishtar përkujton shën Leonin IX, papë. Liturgjia e ditës na thotë se Jezusi
vjen nga Lart. Ai është Biri që Ati e do: ka marrë Shpirtin Shenjt me begati e gjithçka
është lënë në duart e Tij. Të mos e pranosh Krishtin, të mos besosh në Birin, do të
thotë të meritosh zemërimin e Hyjit.
Po më 19 prill, përkujtohet edhe
shtatëvjetori i zgjedhjes së Shenjtërisë së Tij, Benediktit XVI në fronin e Shën Pjetrit. Të
premten më 20 prill, bie festa liturgjike e shën Aniçetit, papë dhe e shën Anjezes
nga Montepulçiano, virgjër dominikane. Këta na kujtojnë se Jezusi përkujdeset, me
një mrekulli, t’i japë të hajë turmës që e ndiqte. Por ai ka ardhur për një jetë shumë
më të lartë e i bën të gjithë ta kuptojnë këtë, ndërsa largohet nga skena e mrekullisë. Të
shtunën që vjen, më 21 prill, do të përkujtohen shën Anselmi, kryeipeshkëv
i Kënterbërit e doktor i Kishës dhe shën Apolloni filozof e martir romak. Liturgjia
e ditës na nxit të meditojmë se largimi i Jezusit në vende të vetmuara nuk do të thotë
se ai i braktis nxënësit e vet. Vetëm kur Krishti është në barkë bashkë me ta, frika
zhduket e barka i afrohet bregut aq të dëshiruar. Të dielën e ardhshme më 22
prill, Kisha do të kremtojë të dielën e 3-të të kohës së Pashkëve e po më 22 prill,
kalendari kishtar përkujton edhe shën Sotirin papë, shën Kajon papë, shën Agapiton
papë e shën Leonidën. Liturgjia e ditës na mëson se dhurata e fesë në Krishtin e Gjallë,
na sjell si fryt dhuratën e Shpirtit Shenjt që na bën ta njohim Atin Qiellor, i cili
na bën dëshmitarë të tij e na bindë të kthehemi në udhën e jetës.