ሰሙነ ሕማማት ሥርዓት ጸሎተ ሳልስቲ:ቅ.ኣ.ር.ሊ.ጳ.፦ °ወዲ ሰብ ኣንጻር እግዚኣብሔር ክቐውም እንከሎ ኣንጻር ሰብኣዊ ሓቅነቱ ይቐውም°

ቅዱስ ኣቦና ር.ሊ.ጳ. በነዲክቶስ መበል 16 ዕለት 5 ሚያዝያ 2012 ዓ.ም. ሥርዓት ሊጡርጊያ ጸሎተ ሓሙስ ንጎሆ ኣብ ቅዱስ ጴጥሮስ ባሲሊካን ድሕሪ ቐትሪ ድማ ኣብ ሮማ ግዳመ ግዝኣት ሃገረ ቫቲካን ኣብ ዝርከብ ቅዱስ ዮሓንስ ዘ ላተራኖ ጳጳሳዊ ባዚሊካ ተረኺቦም ብኵላዊት ቤተ ክርስትያን ሥርዓት እምነት ጸሎተ ሓሙስ ጎይታና ኢየሱስ ክርስቶስ ቅብኣ ቅዱስ ዝተሠረዓሉ ሊጡርጊያ ኣብ መወዳእታ ድራር ምስ ደቀ መዛሙርቱ ኣብ ዝተቐመጠሉ መኣዲ ዝፈጸሞ ቅወማ ቅዱስ ቁርባንን ሕጽበተ እግር ደቀ መዛሙርቱ ከምዝመርሑ ናይ ቅድስቲ መንበር መግለጺ የመልክት።
ጸሎተ ሓሙስ ጎይታና ኢየሱስ ክርስቶስ ቅዱስ ቁርባን ሰሪዑ ዘቖመሉ ዕለት ጥራሕ ዘይኮነስ እታ ኢየሱስ ንብሕቱ ኣብ ጽምዋ ዝተረፈላ ጸላም ለይቲ ‘ለይቲ ደብረ ዘይቲ’ ዘዘኻኽር ከምዝኾነ ቅዱስ ኣቦና ኣብ ዘስሞዎ ስብከት ገሊጾም፣ ኢየሱስ ንመላእ ዘርኢ ሰብ ሓዳሽ ዕለት እግዚኣብሔር ከበስርን ናብታ ምልክት ሞት ዝኾነት ጸልማት ይኣቱ። ጎይታና ኢየሱስ ክርስቶስ እታ ቀዳመይቲ በዓለ ፋሲካ ግብጺ ዘዘኻኽር እዚ ድማ እስራኤላውያን ካብ ግብጺ ስደትን ስደት ኢየሱስ ኣብ እየሩሳሌምን ዝሕብር፣ ኢየሱስ ንእግዚኣብሔር ኣባ ቢሉ ዝጸወዓሉ እዋን ዘዘኻኸር ክምዝኾነን ገሊጾም።
ቅዱስ ሉቃስ ወንጌላዊ ኢየሱስ ኣብታ ሰዓት ተንበርኪኹ ይጽልይ ከምዝነበረ ይሕብረና፣ ክርስትያን እንክብርከኽ ኣብ ናይ ኢየሱስ ጸሎት ደብረ ዘይቲ እዩ ዝኣትው፣ ኣብ ቅድሚ ዓለም እግሩ መሊኦም ደው ዝበለን ከም ውላድ እግዚኣብሔር ድማ ኣብ ቅድሚ እግዚኣብሔር ዝተንበርከኸ እዩ። ኣብ ቅድሚ እግዚኣብሔር ምንብርካኽ ማለት ኣብ ቅድሚ ዓለም እግርኻ መሊኻ ደው ምባል ማለት ምዃኑ ኣረዲኦም፣ ኣብ ቅድሚ ኣቦ ምንብርካኽ ንመለኮታውነቱ ኣሜን ምባልን ንሱ ተኣማንነትና ከምዝስዕር ዝገልጽ ምልክት እውን እዩ ኢሎም።
ኢየሱስ በታ ክሰትያ ዝተቓረበት መራር ጽዋዕ ኣቢሉ ውርደትን መከራን ክፍኣትን ሓሶትን ናብታ እተመልክት ለይቲ ቆላሕታኡ የንብር፣ ንጹሕን ቅዱስን ክነሱ ኣብ ቅድሚ እቲ ኣብ ልዕሊኡ ዝዘንም ዋሕዚ ክፍኣት ናይዚ ዓለም’ዚ፣ ንዓይን ንዓኻን ምእንቲ ኵላትናን ይጽሊ፣ እዚ ናብ ሞት ዘብጽሕ ኩነት ጓህን ስቓይን ንናይ ምድሓን ከይዲ ኣገዳሲ ኵነት እዩ ምስ በሉ፣ ጎይታና ኢየሱስ ክርስቶስ ከም ሰብን ሰብኣዊ ፍቓድን ኣቡኡ እታ ጽዋዕ ካብኡ ከርሕቓ፣ ኩሉ ዝከኣሎ ምዃኑ ኣሚኑ ይሓትት፣ ኣንተኾነ ግን ንሱ ዝደልዮ ዘይኮነስ ድላይ ኣቡኡ ክፍጸም እንክብል፣ ኣቲ ናይ ኣዳም ባህርይ ኩሉ ይልውጦ፣ ትዕቢት እቲ ቀንዲ መሠረት ሓጢኣት እዩ። ወዲ ሰብ ነጻነት ገዛእ ርእሱ ምዃኑ ክሓስብን ድላዩ ጥራሕ ክስዕብ እንከሎን ንእግዚኣብሔር ተጻይ ናይዚ ነጻነት’ዚ ገይሩ ይርእዮን ይሓስቦን። ኢየሱስ ግን ነዚ ዅሉ ዓይነት ኣነባብራን ኣመለኻኽታን ለዊጥዎን እንታይነት ሓቀይና ነጻነት ሰብ ብሕይወቱ ኣነጺርዎን ነቢርዎን እዩ። ወዲ ሰብ ኣንጻር እግዚኣብሔር ክቐውም እንከሎ ኣንጻር ሰብኣዊ ሓቅነቱ ይቐውምን ናጻ ዘይኮነስ ካብ ገዛእ ርእሱ ይጓነይን ይንጸልን።
ብሓቂ ናጻ እንኸውን ምስ እግዚኣብሔር ምስ እንሓበርን ኣብ ሓቅነት ሰብኣውነትና እንተድኣ ሃሊና እዩ። ኢየሱስ ኣብታ ለይቲ ደብረ ዘይቲ ኣብ ናይ ጸሎት ቃልሱ ኣብ መንጎ ተኣዝዞን ናጽነትን ዘሎ ናይ ሓሶት ተጋራጨውነት ኣቃሊዑ፣ ናብ ሓቀይና ናጽነት ዝመርሕ ጎዳና ከፊቱልና ኢዩ ከምዝበሉ ናይ ቅድስቲ መንበር መግለጺ ሓቢሩ።