"Хрысціянін у секулярным грамадстве". Хрысціянства як альтэрнатыва секулярызму
У папярэдніх перадачах
мы заўважылі, што напружанне паміж секулярным і хрысціянскім светапоглядам можна разглядаць
як канфлікт двух спосабаў сузірання жыцця. З аднаго боку, хрысціянства прапаноўвае
чалавеку перажываць свой зямны шлях у перспектыве вечнасці, у перспектыве адносінаў
са звышнатуральным Богам. З другога боку, секулярызм намагаецца зацыкліць чалавека
толькі на зямных клопатах, адкінуць сферу вечнага і звышнатуральнага. Атрымліваецца,
што не ўмацаваны ў сваёй хрысціянскай ідэнтычнасці католік можа ператварыцца ў асобу,
якая намагаецца балансаваць адначасова ў дзьвюх несумяшчальных сістэмах каардынат,
паміж вечнасцю і яе адмаўленнем.
Натуральным наступствам кожнага вагання паміж
супрацьлеглымі перспектывамі заўсёды будзе перавага аднаго або другога боку. Секулярны
спосаб жыцця няспынна спакушае сучаснага чалавека новымі ўзроўнямі камфорту, выгодаў,
задавальненняў. У той жа час такі прыземісты ўзровень функцыянавання пастаянна расчароўвае
сваёй плыткасцю, адсутнасцю глыбейшага сэнсу, падманлівасцю. У людзей, якія заўважаюць
абмежавана
сць секулярнага мыслення, інстынктоўна пачынае нарастаць патрэба
сэнсу і глыбіні. Такія асобы пачынаюць цікавіцца звышнатуральным, несвядома шукаюць
Бога.
Здаецца, наяўнасць хрысціянскага падмурку ў жыцці католіка з’яўляецца
той “падушкай бяспекі”, да якой ён можа вярнуцца, нават калі раней адышоў ад сурёзнай
веры. Адсутнасць гэтага падмурку веры, вынесенага з дзяцінства, з сям’і ці акружэння,
ставіць асобу ў вельмі складанай сітуацыі. Лягчэй таму, каму ёсць да чаго вярнуцца.
А калі ў тым духоўным багажы мінуўшчыны была сурёзная малітва, кантакт з Богам і Касцёлам,
то навяртанне стане фактычна вяртаннем заблукалага ў грахах сына да любячага Нябеснага
Айца.
Зусім у іншай сітуацыі знаходзіцца асоба, якая не мела ў дзяцінстве
нармальнага каталіцкага выхавання, малітвы, ня мела кантакту з Богам і Касцёлам. Такая
асоба, нават адарваўшыся ад секулярызма, зразумеўшы ўсю яго прымітыўнасць, будзе баяцца
хрысціянскай альтэрнатывы, якой не ведае і баіцца пазнаць. Бо калі ў абездухоўленай,
выхаванай на секулярызме асобы разбурыць веру ў чалавека, веру ў зямны прагрэс, веру
ў магчымасці навукі і тэхнікі, веру ў зямны рай, што застанецца? Нішто. Пустэча. Прыкладна
такую драму перажываюць людзі, якія усведамляюць, што секулярызм і зямны рай – гэта
утопія. Але яны не вераць у альтэрнатыву, у па-за зямны сэнс існавання, у звышнатуральнае
і вечнае пакліканне чалавека, у любячага Бога-Асобу. Такія людзі як запужаныя звяркі,
якія выраслі ў клетцы. На пэўным этапе свайго жыцця яны ўсведамляюць, што дзьверкі
клеткі, у якой яны выраслі, не маюць замка, іх можна адчыніць і выйсці на волю. Але
яны не ведаюць, што значыць быць сапраўды вольнымі, жыць па-за клеткай. Іх пужае неспазнанасць
таго, што па-за прывыклым і дасягальным.
Роздум над драмай сучаснага секулярнага
грамадства ставіць хрысціяніна нашых дзён перад сурёзным выклікам. Па-першае, гэта
заклік да таго, каб дапамагчы наймалодшаму пакаленню хоць на нейкім мінімальным узроўні
пазнаць Бога. Простая, базавая катэхізацыя і сакрамэнты могуць дапамагчы стварыць
для сучаснага чалавека тую духоўную “падушку бяспекі”, да якой ён можа вярнуцца, нават
калі запутаецца ў лабірынтах секулярнага спосабу жыцця.
Па-другое, свядомасць
наяўнасці вялікай колькасці людзей, пазбаўленых нават фундаменту веры, ставіць перад
хрысціянамі заданне дапамагчы сустрэцца з Богам тым, хто шукае выйсця, хто жадае вырвацца
з прымітывізму прыземленага мыслення.
І па-трэцяе, перад кожным сучасным вернікам
стаіць выклік, каб дапамагчы тым, хто расчараваўся ў абяцанках секулярнага раю, але
не прыходзіць у касцёл, да Бога, бо носіць у сваёй свядомасці негатыўны вобраз хрысціянства.
Як важна данесці сучаснаму чалавеку праўдзівы вобраз Бога і Касцёла. Перафразуючы
вядомае выказванне бласлаўлёнага Папы Яна Паўла ІІ, можна сказаць, што наш секулярны
сучаснік хутчэй адкрыецца на Бога, калі з боку католікаў будзе сустракаць не столькі
павучэнне, сколькі сведчанне аўтэнтычнага і поўнага энтузіязму жыцця з Богам у Яго
Касцёле.