Святы Айцец у рымскім Калізеі: Крыжовы шлях Езуса змяніў гісторыю чалавека
“Перыяды пакут і
выпрабаванняў, калі перажываюцца разам з Хрыстом і верай у Яго, ужо змяшчаюць у сабе
святло ўваскрасення, новае жыццё ўваскрослага свету, пасху кожнага чалавека, які верыць
у Яго слова”, - з такімі словамі звярнуўся да вернікаў Бэнэдыкт XVI пасля заканчэння
набажэнства Крыжовага Шляху ў рымскім Калізеі. Набажэнства прайшло ў Вялікую Пятніцу
6 красавіка позна вечарам. Яго тэмай былі праблемы сучасных сем’яў: непаразуменні,
разводы, клопат аб будучыні дзяцей, хваробы, беспрацоўе і іншыя негатыўныя наступствы
эканамічнага крызісу. Разважанні падрыхтавалі сужонкі Анна-Марыя і Даніла Дзандзуккі,
жанатыя 60 гадоў. У набажэнстве прынялі ўдзел дзесяткі тысяч вернікаў. Крыж ад стацыі
да стацыі чаргова неслі кардынал Агосціно Валіні, Папскі вікарый для Рымскай дыяцэзіі,
два браты францішкане са Святой Зямлі і чатыры сям’і з Італіі, Ірландыі, Афрыкі і
Лацінскай Амерыкі.
Звяртаючыся да тысяч сабраных перад старажытным амфітэатрам
вернікаў, Папа адзначыў, што Крыжовы шлях Хрыста хоць “здавалася, што быў безвыходным,
змяніў жыццё і гісторыю чалавека, адкрыў пераход да “новых нябёсаў і новай зямлі”.
“У
смутку і цяжкасцях мы не адны; сем’і таксама не адны. Езус прысутны са сваёй любоўю,
патрымлівае іх сваёй ласкай і дае энергію, каб ісці наперад. Менавіта да гэтай любові
Хрыста мы павінны звяртацца калі чалавечыя слабасці і цяжкасці рызыкуюць параніць
адзінства нашага жыцця і сям’і”, - сказаў Папа.
Пантыфік падкрэсліў, што ва
ўкрыжаваным Хрысце нават смерць набывае новае значэнне – яна, “пераможанная, становіцца
пераходам да новага жыцця”.