Вечарам 6 красавіка
Бэнэдыкт XVI прыняў удзел у набажэнстве Мукі Пана, якое прайшло ў базыліцы св. Пятра.
Гамілію да ўдзельнікаў літургіі прамовіў прапаведнік Папскага дома айцец Раньера Канталамеса.
Капуцын звярнуў увагу на тое, што набажэнства мукі Пана робіць сёння прысутнымі і
дзейснымі сапраўдныя гістарычныя падзеі. Ён адзначыў, што ніхто не перажывае смерць
вядомых гістарычных постацяў, так як перажываюць смерць Хрыста, бо толькі Ён уваскрос.
“Мы не святкуем просты юбілей, але таямніцу”, - сказаў айцец Канталамеса і падкрэсліў,
што аб муке Хрыста “неабходна ўзгадваць такім чынам, каб было зразумела яе значэнне
і магчыма было прыняць яе па-святому”. “Гэта змяняе ўсё. Гаворка ідзе не аб тым, каб
прысутнічаць на мерапрыемстве, але “прыняць” яго значэнне. Ніхто не можа застацца
нейтральным; але неабходна выбраць: быць Пілатам, які ўмывае рукі, ці натоўпам, які
глядзеў здалёк. Калі, сёння вечарам вернемся дамоў і хтосьці спытаецца “Адкуль ідзеш?”,
“Дзе ты быў?”, адкажам тады, прынамсі ў сэрцы: “На Кальварыі!”, - заклікаў прапаведнік.
Айцец
Канталамеса адзначыў, што немагчыма да канца зразумець значэнне гэтай літургіі без
веры ў бязмежную міласэрнасць Бога. Ён прывёў прыклад, у якім заклікаў вернікаў уявіць,
што адзін з уладальнікаў дарагой крамы ў цэнтры Рыма запрасіў да сябе вакзальных бяздомных,
абмыў іх і прапанаваў выбраць любую з вопратак, якая ім спадабаецца. “Усе скажуць
на гэта: “Казка, такога не будзе ніколі! Сапраўды, але тое, што ніколі не здараецца
паміж людзьмі, можа здарыцца кожны дзень паміж чалавекам і Богам, бо перад ім мы ўсе
жабракі”, - сказаў айцец Канталамеса. Ён заклікаў вернікаў прыступіць да сакрамэнту
споведзі, які падобны на такую сустрэчу. “Бог забірае нашу старую вопратку, грахі,
абмывае сваёй міласэрнасцю і ўзвышае, апранаючы ў вопратку збаўлення і плашч справядлівасці”,
- сказаў айцец Канталамеса.